ٹیلی کام اور وینچر کیپٹل کمپنیوں نے ٹیکس میں ریلیف کی درخواست کردی

ٹیلی کام انفرااسٹرکچر کمپنیوں اور وینچر کیپٹل (وی سی) فرموں کے وفد نے پاکستان کے موجودہ ٹیکس نظام میں اصلاحات اور ریلیف کی تجاویز پیش کی ہیں ، تاکہ شعبے کی ترقی کو فروغ ، سرمایہ کاری کو متوجہ کیا جا سکے اور ٹیلی کام و وی سی شعبوں کی توسیع میں مدد ملے۔

وفد نے وزیر خزانہ محمد اورنگزیب سے ملاقات کی، جس میں ٹیلی کام انفرااسٹرکچر کمپنیز (ٹاور کو پاکستان)،وینچر کیپٹل فرمز، قانونی و ریگولیٹری مشاورتی ادارے اور متعلقہ سرکاری ادارے شریک تھے۔

ملاقات میں شعبے کے کاروباری ماڈلز، عملی چیلنجز اور بنیادی ڈھانچے کی ترقی اور ضابطہ کاری کے مسائل پر تبادلہ خیال کیا گیا۔

وفد نے ٹیکس نظام میں اصلاحات کے متعدد نکات پیش کیے ، تاکہ ڈیجیٹل کنیکٹیویٹی، سروس کی بہتری اور جدت پر مبنی اقتصادی سرگرمیوں کو فروغ دیا جا سکے۔ وزیر خزانہ نے ٹیلی کام انفرااسٹرکچر اور وینچر کیپٹل کے کردار کو سراہا اور کہا کہ طویل مدتی سرمایہ کاری کے لیے شفاف اور ترقی پسند پالیسی فریم ورک ضروری ہے۔

ملاقات میں یہ بھی طے پایا کہ ایک مخصوص ورکنگ گروپ بنایا جائے گا جو تجاویز کا تفصیلی جائزہ لے کر عملی سفارشات تیار کرے گا۔ حکومت نے ٹیکنالوجی اور سرمایہ کاری پر مبنی شعبوں میں پرائیویٹ سیکٹر کی ترقی کی حمایت جاری رکھنے کا اعادہ کیا۔