ٹیکس ریٹرنز 5.9 ملین تک پہنچ گئیں، وزیراعظم کی توسیع نہ دینے کی ہدایت

وزیرِاعظم نے فیڈرل بورڈ آف ریونیو (ایف بی آر) کو ہدایت کی ہے کہ انکم ٹیکس ریٹرنز جمع کرانے کی مدت میں توسیع نہ دی جائے کیونکہ 31 اکتوبر تک ریٹرنز جمع کرانے والوں کی مجموعی تعداد 59 لاکھ تک پہنچ گئی۔

فیڈرل بورڈ آف ریونیو نے ٹیکس ایئر 2025 کے لیے ریٹرنز میں نمایاں اضافہ ریکارڈ کیا جو رضاکارانہ ٹیکس ادائیگی اور ٹیکس دہندگان میں بڑھتی ہوئی آگاہی کا نیا سنگِ میل ہے۔ گزشتہ سال کے اسی عرصے میں 50 لاکھ ریٹرنز جمع ہوئے تھے جبکہ اس سال 17.6 فیصد اضافہ ریکارڈ کیا گیا ہے۔

ان میں سے 36 لاکھ ٹیکس دہندگان نے ریٹرنز کے ساتھ ٹیکس بھی جمع کرایا جو گزشتہ سال کے مقابلے میں 18.6 فیصد زیادہ ہے۔ انفرادی ٹیکس دہندگان نے گزشتہ سال کے مقابلے میں تقریباً 9 ارب روپے اضافی ٹیکس ادا کیا جو 60 ارب روپے سے بڑھ کر 69 ارب روپے ہوگیا، یعنی 15 فیصد اضافہ ریکارڈ کیا گیا۔

ایف بی آر نے شہریوں کے بڑھتے ہوئے تعاون کو سراہا اور اس عزم کا اعادہ کیا کہ دیانتدار ٹیکس دہندگان کو آسان طریقہ کار، ڈیجیٹل سہولتیں اور بروقت رہنمائی کے ذریعے سہولت فراہم کی جائے گی تاکہ پاکستان کا ٹیکس نظام زیادہ منصفانہ، شفاف اور جامع بنایا جاسکے۔

ٹیکس ریٹرنز میں اس نمایاں اضافے کا سہرا ایف بی آر کی مؤثر آگاہی مہم اور وزیرِاعظم آفس و وزارتِ اطلاعات کی مشترکہ حکومتی کوششوں کو دیا جارہا ہے جن کا مقصد ٹیکس دہندگان میں شہری ذمہ داری کے احساس کو اجاگر کرنا اور ڈیجیٹل پلیٹ فارمز کے ذریعے ریٹرنز فائل کرنے کے عمل کو آسان اور قابلِ رسائی بنانا تھا۔

ریٹرن فائلنگ میں اضافہ وزیرِاعظم آفس، وزارتِ اطلاعات اور ایف بی آر کی جانب سے مشترکہ طور پر چلائی گئی جامع آگاہی مہم کا نتیجہ ہے۔ ان کوششوں کے تحت شہریوں کو ٹیکس ریٹرن جمع کرانے کی شہری ذمہ داری یاد دلانے کے لیے ملک بھر میں روبو کالز اور واٹس ایپ پیغامات بھیجے گئے۔اس کے علاوہ ایف بی آر نے تیسرے فریق کے ڈیٹا کی مدد سے ٹیکس دہندگان کو رویّے پر مبنی پیغامات بھی ارسال کیے جن کا آغاز تعریفی نوٹسز سے ہوا، اس کے بعد حقوق و فرائض سے متعلق معلوماتی پیغامات بھیجے گئے، اور آخر میں احتیاطی یاد دہانیاں جاری کی گئیں۔ اس سلسلے میں ملک بھر میں تقریباً 8 لاکھ ایسے پیغامات ارسال کیے گئے۔

ان اقدامات کی تکمیل کے طور پر تقریباً 70 ہزار ٹیکس دہندگان کو ہدفی ای میلز بھیجی گئی ہیں، جن میں ہم منصبوں کی متوقع آمدنی کی معلومات فراہم کی گئی تاکہ ٹیکس ریٹرنز بروقت اور درست جمع کرائے جائیں۔ ان مربوط کوششوں کو شہریوں کی جانب سے مثبت ردعمل ملا ہے۔

وزیرِاعظم کی ہدایات کے مطابق، ریٹرن فائلنگ کی آخری تاریخ میں کوئی عمومی توسیع نہیں دی گئی۔ تاہم، حقیقی مشکلات کا سامنا کرنے والے ٹیکس دہندگان ایف بی آر کے آئرس سسٹم کے ذریعے اپنے متعلقہ فیلڈ دفاتر سے ریٹرنز جمع کرانے کے لیے توسیع کی درخواست کر سکتے ہیں۔

کاپی رائٹ بزنس ریکارڈر 2025