بھارت کی برآمدات کو بڑا جھٹکا، امریکہ کا کل سے 25 فیصد اضافی ٹیرف نافذ کرنے کا اعلان

امریکی محکمہ ہوم لینڈ سیکیورٹی کی تازہ اطلاع کے مطابق بدھ سے بھارت سے درآمد ہونے والی تمام اشیاء پر اضافی 25 فیصد ٹیرف عائد کیا جائے گا، جس کے بعد بھارتی برآمدات پر امریکی ڈیوٹیز کی مجموعی شرح 50 فیصد تک پہنچ جائے گی۔ یہ امریکہ کی جانب سے کسی بھی ملک پر عائد کیے گئے سب سے زیادہ ٹیرف میں سے ایک تصور کیا جا رہا ہے۔ صدر ڈونلڈ ٹرمپ نے اس اقدام کا اعلان رواں ماہ کے آغاز میں روسی تیل کی بھارتی خریداری میں اضافے کے ردعمل کے طور پر کیا تھا۔

نوٹیفکیشن کے مطابق یہ ٹیرف ان تمام اشیا پر لاگو ہوگا جو امریکہ میں کھپت کے لیے درآمد ہوں گی یا گودام سے نکالی جائیں گی۔ البتہ، انسانی ہمدردی کی بنیاد پر بھیجی جانے والی امداد، درست سرٹیفکیشن رکھنے والے ٹرانزٹ میں موجود سامان اور باہمی تجارتی معاہدوں کے تحت آنے والی اشیا کو استثنیٰ دیا گیا ہے۔

اس اعلان کے بعد بھارتی روپے کی قدر بھی دباؤ کا شکار ہوئی اور منگل کے روز یہ ڈالر کے مقابلے میں 0.17 فیصد کم ہوکر 87.72 پر آگیا۔ بھارتی وزارتِ تجارت نے فوری طور پر کوئی ردعمل نہیں دیا، تاہم ایک اعلیٰ حکومتی اہلکار نے بتایا کہ فوری ریلیف یا تاخیر کی کوئی امید نہیں۔ انہوں نے کہا کہ متاثرہ برآمد کنندگان کو مالی معاونت فراہم کی جائے گی اور انہیں چین، لاطینی امریکا اور مشرق وسطیٰ جیسے متبادل منڈیوں میں توسیع کی ترغیب دی جائے گی۔

اہلکار نے مزید کہا کہ حکومت نے تقریباً 50 ممالک کی نشاندہی کی ہے جہاں بھارت ٹیکسٹائل، فوڈ پراسیسنگ مصنوعات، لیدر اور سمندری خوراک کی برآمدات بڑھا سکتا ہے۔ دوسری جانب وزیراعظم نریندر مودی نے کہا ہے کہ بھارت کسانوں کے مفاد پر کوئی سمجھوتہ نہیں کرے گا چاہے اس کی بھاری قیمت کیوں نہ ادا کرنی پڑے۔ مودی اس ماہ کے آخر میں سات سال بعد چین کا پہلا دورہ بھی کرنے جا رہے ہیں تاکہ دوطرفہ تعلقات میں بہتری لائی جا سکے۔