میکسیکو میں شدید بارشوں اور سیلاب سے 2 افراد ہلاک

میکسیکو کے وسطی علاقے میں شدید بارشوں کے باعث آنے والے سیلاب نے دو افراد کی جان لے لی۔

مقامی حکام کے مطابق یہ لاشیں شہر کویریتارو میں جمعہ کی رات برآمد ہوئیں، جہاں دونوں افراد برساتی پانی میں بہہ گئے۔ ہفتے کو بھی کویریتارو میں موسلا دھار بارش سے مکانات اور دیگر املاک کو نقصان پہنچا جس کے بعد وفاقی حکام نے فوجی ہنگامی امدادی منصوبہ فعال کر دیا۔

میکسیکو سٹی میں بھی شدید بارش کے باعث بینیٹو خواریز انٹرنیشنل ایئرپورٹ پر پروازوں کا سلسلہ عارضی طور پر معطل رہا کیونکہ حدِ نگاہ نہ ہونے کے برابر تھی۔ رواں ماہ کے اوائل میں بھی یہی ایئرپورٹ بارش اور سیلاب سے متاثر ہوا تھا۔

سرکاری ریکارڈ کے مطابق دارالحکومت میں اس سال بارشیں 1952 کے بعد سب سے شدید رہی ہیں جبکہ جون کو 1985 کے بعد تیسرا سب سے زیادہ بارش والا مہینہ قرار دیا گیا ہے۔

ماہرین کے مطابق موسمیاتی تبدیلیوں نے بارشوں کی شدت اور تباہ کن سیلاب کے خطرات بڑھا دیے ہیں۔