اسرائیل فضائی حملے روکے اور مستقل راہداریاں کھولے تو یرغمالیوں کو امداد کی فراہمی کی اجازت دیں گے، حماس

غزہ میں حماس نے کہا ہے کہ اگر اسرائیل انسانی امداد کی راہ میں رکاوٹیں مستقل طور پر ختم کرے اور فضائی حملے بند کرے تو وہ یرغمالیوں کو امداد کی فراہمی میں ریڈ کراس کے ساتھ تعاون کے لیے تیار ہے۔ یہ بیان اس وقت آیا جب حماس نے ایک ویڈیو جاری کی جس میں اسرائیلی یرغمالی ایویاتار ڈیوڈ کو شدید نحیف حالت میں دکھایا گیا، جو مبینہ طور پر اپنی ہی قبر کھود رہا تھا۔

اس ویڈیو پر مغربی ممالک نے سخت ردعمل دیا۔ فرانس، جرمنی، برطانیہ اور امریکہ نے ویڈیو کو انسانیت سوز قرار دیا۔ اسرائیلی وزیر اعظم بینجمن نیتن یاہو نے ریڈ کراس سے بات چیت میں یرغمالیوں کو فوری انسانی امداد کی فراہمی کی اپیل کی ہے۔

اسرائیلی حکام کے مطابق اب بھی 50 یرغمالی غزہ میں موجود ہیں، جن میں سے صرف 20 کے زندہ ہونے کی توقع ہے۔

ادھر غزہ کی وزارت صحت کے مطابق گزشتہ 24 گھنٹوں میں بھوک اور غذائی قلت سے مزید 6 افراد جاں بحق ہو چکے ہیں، جس سے ایسے ہلاکتوں کی تعداد 175 ہو گئی ہے، جن میں 93 بچے شامل ہیں۔

اسرائیل نے حالیہ عالمی دباؤ کے بعد امداد کے کچھ اقدامات کیے ہیں، جن میں وقفے وقفے سے جنگ بندی، ایئر ڈراپس اور محفوظ راہداریاں شامل ہیں۔ تاہم اقوام متحدہ کا کہنا ہے کہ یہ اقدامات ناکافی ہیں اور زمینی راستے سے بڑے پیمانے پر امداد کی فوری ضرورت ہے۔

فلسطینی طبی حکام کے مطابق اتوار کو اسرائیلی حملوں میں کم از کم 80 افراد شہید ہوئے، جن میں امدادی مراکز کے قریب موجود افراد اور فلسطینی ریڈ کریسنٹ کا ایک کارکن بھی شامل ہے۔