ٹیکس ہدف پھر حاصل نہ ہوسکا

جیسا کہ طویل عرصے سے توقع کی جا رہی تھی فیڈرل بورڈ آف ریونیو (ایف بی آر) مالی سال 2024-25 کے لیے اپنا ٹیکس وصولی کا ہدف حاصل کرنے میں ناکام رہا اور 12.9 کھرب روپے کے اصل ہدف کے مقابلے میں صرف 11.7 کھرب روپے کی وصولی کرسکا۔ سال کے دوران ایف بی آر کی کمزور کارکردگی کے باعث اس ہدف میں دو بار کمی کی گئی — پہلے اسے 12.3 کھرب روپے تک لایا گیا پھر مزید کم کرکے 11.9 کھرب روپے کردیا گیا۔

آخرکار ایف بی آر ابتدائی تخمینے سے ایک کھرب روپے سے زائد پیچھے رہ گیا اور نرمی کے ساتھ مقرر کردہ آخری ہدف سے بھی 163 ارب روپے کم وصول کرسکا۔ ان مسلسل کمیوں اور بار بار کے ہدف سے چوک جانے کا مطلب صرف ٹیکس بیوروکریسی اور اقتصادی منتظمین کی غلط حساب کتاب نہیں — اگرچہ یہ پہلو بھی اپنی جگہ تشویشناک ہے۔

زیادہ بنیادی سطح پر دیکھا جائے تو یہ صورتحال ملک کے ٹیکس نظام کی گہری اور دیرینہ خامیوں کی اصلاح میں ناکامی کو بے نقاب کرتی ہے — ایسی خامیاں جو نظام کی جڑوں میں پیوست ہیں اور جن کی اصلاح کے بغیر کوئی پائیدار بہتری ممکن نہیں۔

ریونیو کے اہداف اس کے باوجود حاصل نہ ہوسکے کہ تنخواہ دار طبقے اور کارپوریٹ سیکٹر پر بھاری بھرکم ٹیکس عائد کیے گئے، تقریباً تمام ضروری اشیائے صرف کو ٹیکس نیٹ میں لایا گیا، ایف بی آر نے اپنی ڈیجیٹل انفرااسٹرکچر کو اپ گریڈ کیا، اسمگلنگ کے خلاف کارروائیاں شروع کیں اور سال کے دوران 1.3 کھرب روپے کے اضافی ٹیکس اقدامات متعارف کروائے۔ بالآخر، ایف بی آر کی مایوس کن کارکردگی کا مطلب یہ بھی رہا کہ وہ آئی ایم ایف کی مقرر کردہ ٹیکس ٹو جی ڈی پی کی 10.6 فیصد کی حد بھی حاصل نہ کرسکا۔

اس کے باوجود یہ تسلیم کرنا ضروری ہے کہ ہدف حاصل نہ ہونے کے باوجود ایف بی آر نے پچھلے سال کے مقابلے میں 26 فیصد زیادہ ریونیو اکٹھا کیا، جو اس بات کی طرف اشارہ کرتا ہے کہ مسئلے کا ایک پہلو حد سے زیادہ پُر امید ہدف مقرر کرنا بھی تھا۔ سالانہ ٹیکس اہداف کا انحصار بعض بنیادی اقتصادی اشاریوں پر مبنی اندازوں پر ہوتا ہے، جن میں جی ڈی پی کی شرح نمو، سود کی شرح، مہنگائی اور پالیسی اقدامات شامل ہوتے ہیں — بالخصوص وہ اقدامات جو آئی ایم ایف پروگرام سے وابستہ ہوتے ہیں۔

جب یہ اندازے درست نہ ہوں تو اس کے نتیجے میں ریونیو سے متعلق توقعات بھی حقیقت سے ہٹ جاتی ہیں۔ اس معاملے میں بھی ایف بی آر کے حکام نے ریونیو کی کمی کی اہم وجوہات کے طور پر درآمدات کے حجم، مہنگائی کے دباؤ اور بلند معاشی ترقی کے حد سے زیادہ پر امید تخمینوں کو قرار دیا ہے — جو کہ بالآخر پورے نہ ہوسکے۔

تاہم ہدف بندی اور معاشی اشاریوں کے غلط تخمینے سے بڑھ کر مسئلہ ملک کے مالیاتی ڈھانچے کی بنیادی خامیوں میں پوشیدہ ہے، جن میں سب سے اہم مستقل طور پر محدود ٹیکس بیس ہے۔ موجودہ نظام بدستور تنخواہ دار طبقے اور کارپوریٹ سیکٹر پر غیر متناسب بوجھ ڈالتا ہے — جنہوں نے مالی سال 2024-25 میں مجموعی طور پر قومی خزانے میں 5.8 کھرب روپے کا نمایاں حصہ ڈالا — جب کہ نچلے اور درمیانے آمدنی والے طبقے بھی اس بوجھ سے مستثنیٰ نہیں۔

دوسری جانب، بڑے اور اکثر زیادہ منافع بخش شعبے — جیسے کہ ریٹیل، زراعت اور رئیل اسٹیٹ — یا تو کم ٹیکس دیتے ہیں یا مکمل طور پر ٹیکس نیٹ سے باہر ہیں۔ اس عدم توازن کو مؤثر طور پر دور کرنے کے لیے درکار حقیقی سیاسی عزم اور پالیسی کی بصیرت بدستور افسوسناک حد تک ناپید ہے۔

ایف بی آر کی جانب سے مسلسل بڑھتے ہوئے ٹیکس ریٹس اور جارحانہ ٹیکسیشن اقدامات پر انحصار کا نتیجہ یہ نکلا ہے کہ وقت کے ساتھ ساتھ پاکستان ٹیکس کی شرح کے لحاظ سے تو اسکینڈینیوین ممالک جیسا نظر آنے لگا ہے، لیکن عوام کو وہ سرکاری خدمات، سماجی تحفظات یا ادارہ جاتی جوابدہی فراہم نہیں کی جا رہیں جو عموماً ایسے بھاری ٹیکسز کا جواز بنتی ہیں۔

محدود ٹیکس بیس کے مسئلے کو حل کرنے کے لیے جن اصلاحات کی ضرورت ہے — جیسے کہ وسیع پیمانے پر پھیلے ریٹیل اور ہول سیل سیکٹرز کو ٹیکس نیٹ میں لانا — وہ تاحال بڑی حد تک نافذ نہیں ہوسکیں۔ اسی طرح زرعی آمدنی پر مؤثر ٹیکس لگانے کا عمل بھی سیاسی عزم سے نہیں بلکہ آئی ایم ایف دباؤ کے تحت شروع ہوا ہے۔ ایک ہی طبقے سے بار بار ٹیکس وصولی کی حد ہوتی ہے؛ اس حد سے آگے بڑھ کر ٹیکس کی شرح میں اضافے کا نتیجہ قانون کی پاسداری میں بہتری کے بجائے ٹیکس چوری کی ترغیب کی صورت میں نکلتا ہے۔

جب گزشتہ سال کا ریونیو ہدف مقرر کیا گیا، تو اُس وقت کے ایف بی آر چیئرمین، امجد زبیر تیوانہ، نے خبردار کیا تھا کہ محصولات کی وصولی 11.8 کھرب روپے سے تجاوز کرنا ممکن نہیں لگتی — اور یہی پیش گوئی درست ثابت ہوئی۔ اس سے ظاہر ہوتا ہے کہ نظام کی حدود سے متعلق بالائی سطح پر آگاہی موجود ہے، لیکن اس کے باوجود مؤثر اور نتیجہ خیز اصلاحات کا فقدان برقرار ہے۔ اس کے برعکس توجہ بدستور نئے، اکثر جارحانہ ٹیکس اقدامات متعارف کروانے اور ایف بی آر کے جابرانہ اختیارات کو مزید وسعت دینے پر مرکوز ہے، تاکہ انہی پہلے سے دبے ہوئے طبقات سے مزید وصولی کی جاسکے۔

جب تک ٹیکس بیس کو وسعت دینے کے لیے سیاسی عزم، انتظامی صلاحیت، مؤثر پالیسی سازی اور ادارہ جاتی جوابدہی عملی صورت اختیار نہیں کرتیں، تب تک محصولات کے یہ غیر حقیقی اہداف اور مایوس کن کارکردگی کا یہ چکر یونہی چلتا رہے گا۔

کاپی رائٹ بزنس ریکارڈر 2025