مجموعی قرضوں کا حجم 76007 ارب روپے تک پہنچ گیا

حکومت کے مجموعی قرضوں کا حجم جاری مالی سال کے پہلے 9 ماہ کے دوران 76007 ارب روپے تک پہنچ گیا۔

اقتصادی سروے 2024-25 کے مطابق مارچ 2025 کے اختتام تک پاکستان کا مجموعی قرضوں کا حجم 76,007 ارب روپے ریکارڈ کیا گیا جو رواں مالی سال کے پہلے نو ماہ کے دوران 4,761 ارب روپے (6.7 فیصد) کے اضافے کو ظاہر کرتا ہے۔ 30 جون 2024 تک یہ قرضہ 71,246 ارب روپے تھا۔

مارچ 2025 کے اختتام تک پاکستان کا بیرونی قرضہ 87.4 ارب ڈالر ریکارڈ کیا گیا جو رواں مالی سال کے پہلے نو ماہ کے دوران تقریباً 88 کروڑ 30 لاکھ ڈالر کے اضافے کو ظاہر کرتا ہے جبکہ گزشتہ مالی سال کی اسی مدت میں یہ اضافہ 2.6 ارب ڈالر تھا۔ تاہم، اس میں زرمبادلہ کی واجبات، عوامی شعبے کے اداروں ، بینکوں اور نجی شعبے کے قرضے شامل نہیں ہیں۔

اسٹیٹ بینک کے مطابق مارچ 2025 کے اختتام تک ملک کے بیرونی قرضے اور واجبات کا حجم 130.310 ارب ڈالر تک پہنچ گیا۔ اس میں سرکاری بیرونی قرضہ، قلیل مدتی قرضے، بین الاقوامی مالیاتی فنڈ (آئی ایم ایف) سے حاصل کردہ قرضہ، زرمبادلہ کی واجبات، عوامی شعبے کے اداروں، بینکوں اور نجی شعبے کے قرضے شامل ہیں۔

مارچ 2025 کے اختتام تک پاکستان کا مقامی قرضہ 51.5 کھرب روپے ریکارڈ کیا گیا، جو رواں مالی سال کے پہلے نو ماہ کے دوران 4.8 کھرب روپے کے اضافے کو ظاہر کرتا ہے۔ جون 2024 کے اختتام پر یہ قرضہ 47.160 کھرب روپے تھا۔

عوامی قرضے میں 4,761 ارب روپے کے اضافے میں وفاقی بنیادی خسارے کی مد میں 2,415 ارب روپے، قرض پر سود کی ادائیگی کیلئے 6,439 ارب روپے، اور دیگر عوامل (زرِمبادلہ کی شرح، نقد بیلنس، اور اکاؤنٹنگ اثرات) کے تحت 738 ارب روپے شامل ہیں۔

بیرونی قرضے میں زیادہ حصہ سرکاری قرضے کا ہے جو 79.131 ارب ڈالر پر مشتمل ہے جب کہ آئی ایم ایف سے حاصل کردہ قرضہ 8.277 ارب ڈالر ہے۔ آئی ایم ایف کا یہ قرضہ مزید تقسیم کیا گیا ہے جس میں وفاقی حکومت کا قرضہ 3.878 ارب ڈالر اور مرکزی بینک کا قرضہ 4.399 ارب ڈالر شامل ہے۔

حکومتی بیرونی قرضہ زیادہ تر طویل المدتی نوعیت کا ہے، جس میں 78.181 ارب ڈالر طویل المدتی قرضہ (ایک سال سے زائد مدت والا) اور 95 کروڑ 50 لاکھ ڈالر قلیل المدتی قرضہ (ایک سال سے کم مدت والا) شامل ہے۔

طویل المدتی بیرونی قرضوں کے ذرائع میں کثیرالجہتی قرضوں کا سب سے بڑا حصہ ہے، جو 40.468 ارب ڈالر پر مشتمل ہے اور طویل المدتی بیرونی قرضے کا تقریباً 51.8 فیصد بنتا ہے۔ یہ قرضے عالمی ترقیاتی شراکت داروں جیسے ورلڈ بینک اور ایشیائی ترقیاتی بینک کی جانب سے فراہم کیے جاتے ہیں اور نرم شرائط پر مبنی ہوتے ہیں، جن میں کم شرح سود اور طویل ادائیگی کی مدت شامل ہے۔

پیرس کلب کے تحت قرضہ 5.943 ارب ڈالر ہے جو پاکستان کے طویل المدتی بیرونی سرکاری قرضے کا تقریباً 7.6 فیصد بنتا ہے۔ پیرس کلب سے باہر کے ممالک سے حاصل کردہ دوطرفہ قرضے 17.860 ارب ڈالر پر مشتمل ہیں، جو طویل المدتی قرضے کا 22.8 فیصد حصہ ہیں۔

غیر ملکی کمرشل بینکوں سے حاصل کردہ بقایا قرضے 5.850 ارب ڈالر ہیں جو طویل المدتی قرضے کا تقریباً 7.5 فیصد بنتے ہیں۔ یہ قرضے قلیل تا اوسط مدت (یعنی 1 سے 3 سال) کے لیے لیے گئے ہیں اور ان پر مارکیٹ کے مطابق شرح سود عائد ہوتی ہے۔ قلیل مدتی قرضہ، جو ری فنانسنگ کے خطرے سے دوچار ہوتا ہے، نسبتاً کم ہے۔ کثیرالجہتی اداروں کے قلیل مدتی قرضے 426 ملین ڈالر ہیں جب کہ مقامی کرنسی میں سیکیورٹیز (ٹی بلز) کی مد میں مزید 524 ملین ڈالر شامل ہیں۔

مالی سال 2025 کے پہلے نو ماہ کے دوران بیرونی قرضوں کی مد میں مجموعی ترسیلات 5.066 ارب ڈالر رہیں۔ اس میں سب سے بڑا حصہ کثیرالجہتی ذرائع کا تھا، جو 2.797 ارب ڈالر رہا، اس کے بعد کمرشل/دیگر ذرائع سے 2.011 ارب ڈالر اور دوطرفہ ذرائع سے 258 ملین ڈالر موصول ہوئے۔ اس عرصے کے دوران کوئی بانڈ جاری نہیں کیا گیا۔ قرضوں کی مجموعی ادائیگیاں 5.636 ارب ڈالر رہیں، جن میں سب سے زیادہ ادائیگی کثیرالجہتی قرض دہندگان کو 2.828 ارب ڈالر کی گئی، اس کے بعد دوطرفہ قرض دہندگان کو 1.565 ارب ڈالر اور کمرشل/دیگر ذرائع کو 1.243 ارب ڈالر ادا کیے گئے۔

سود کی ادائیگیاں مجموعی طور پر 2.660 ارب ڈالر رہیں، جن میں سب سے زیادہ رقم کثیرالجہتی قرض دہندگان کو 1.315 ارب ڈالر ادا کی گئی۔

کاپی رائٹ: بزنس ریکارڈر، 2025