اینگرو پاورجن قادرپور نے خرم عبداللہ کو سی ای او تعینات کردیا، اطہر خواجہ مستعفی

اینگرو انرجی لمیٹڈ کی ذیلی کمپنی اینگرو پاورجن قادرپور لمیٹڈ (ای پی کیو ایل) نے خرم عبداللہ کو 15 اکتوبر سے کمپنی کا چیف ایگزیکٹو آفیسر (سی ای او) مقرر کرنے کا اعلان کیا ہے۔ وہ اطہر ابرار خواجہ کی جگہ ذمہ داریاں سنبھالیں گے، جنہوں نے اس عہدے سے استعفیٰ دے دیا ہے اور کمپنی کے بورڈ میں بطور ڈائریکٹر شامل ہوگئے ہیں۔

اسٹاک ایکسچینج میں لسٹڈ کمپنی نے پاکستان اسٹاک ایکسچینج (پی ایس ایکس) کو بھیجے گئے نوٹس میں اس پیش رفت سے آگاہ کیا۔

نوٹس کے مطابق این گرو پاورجن قادرپور لمیٹڈ کے بورڈ آف ڈائریکٹرز نے خرم عبداللہ کو 15 اکتوبر 2026 سے کمپنی کا سی ای او مقرر کردیا ہے۔

کمپنی نے بتایا کہ خرم عبداللہ ڈائریکٹرز کے آئندہ انتخاب کی تاریخ تک اپنی موجودہ مدت کے بقیہ عرصے کے لیے اس عہدے پر کام کریں گے۔

نوٹس میں مزید کہا گیا کہ اس تبدیلی کے سلسلے میں اطہر ابرار خواجہ نے کمپنی کے سی ای او کے عہدے سے استعفیٰ دے دیا ہے اور بورڈ میں خالی ہونے والی نشست پر انہیں ڈائریکٹر مقرر کیا گیا ہے۔ وہ بھی ڈائریکٹرز کے آئندہ انتخاب کی تاریخ تک اپنی مدت کے بقیہ عرصے کے لیے اس عہدے پر فائز رہیں گے۔

ای پی کیو ایل ایک آزاد بجلی پیدا کرنے والی کمپنی ہے، جو 2006 میں قائم ہوئی اور اس کا صدر دفتر کراچی میں ہے۔ کمپنی ضلع گھوٹکی میں قادرپور کے قریب 217 میگاواٹ صلاحیت کا کمبائنڈ سائیکل پاور پلانٹ چلاتی ہے۔

پاور پلانٹ میں گیس ٹربائن، ہیٹ ریکوری اسٹیم جنریٹر (ایچ آر ایس جی) اور اسٹیم ٹربائن پر مشتمل نظام نصب ہے۔ اس پلانٹ نے مارچ 2010 میں کمرشل بنیادوں پر بجلی کی پیداوار شروع کی تھی۔

ای پی کیو ایل بنیادی طور پر قادرپور گیس فیلڈ سے حاصل ہونے والی پرمی ایٹ گیس کو ایندھن کے طور پر استعمال کرتی ہے۔ یہ گیس ایک ضمنی پیداوار ہے، جسے 1995 میں گیس فیلڈ کی ترقی کے بعد پہلے جلایا جاتا تھا اور یوں ضائع کردیا جاتا تھا۔ ہائی اسپیڈ ڈیزل (ایچ ایس ڈی) متبادل ایندھن کے طور پر استعمال کیا جاتا ہے۔

کمپنی اکتوبر 2014 میں کراچی اسٹاک ایکسچینج میں لسٹ ہوئی تھی۔این گرو انرجی لمیٹڈ، جو پہلے این گرو پاورجن لمیٹڈ کے نام سے جانی جاتی تھی، تاریخی طور پر ای پی کیو ایل کی بڑی شیئر ہولڈر رہی ہے۔ 31 دسمبر 2018 تک اس کے پاس کمپنی کے تقریباً 69 فیصد حصص تھے۔

فروری 2026 میں اینگرو انرجی لمیٹڈ نے اپنے تقریباً 18.53 فیصد حصص ڈیڑھ ارب روپے میں فروخت کردیے، جس کے بعد کمپنی میں اس کی حصص داری 68.89 فیصد سے کم ہوکر 50.36 فیصد رہ گئی۔ تاہم کمپنی نے اکثریتی حصص، انتظامی کنٹرول اور ملکیت برقرار رکھی۔