آئی ایم ایف نے قرض، ترقی اور اصلاحات کے لیے پاکستان کو کامیاب ماڈل قرار دے دیا

عالمی مالیاتی فنڈ (آئی ایم ایف) نے پائیدار قرضوں، مضبوط اقتصادی نمو اور اصلاحات کے فروغ کے لیے عالمی بینک کے ساتھ اپنے تین ستونوں پر مبنی مشترکہ طریقہ کار کی کامیاب مثال کے طور پر پاکستان کا حوالہ دیا ہے۔ اس طریقہ کار میں بالخصوص ملکی وسائل کو بہتر انداز میں متحرک کرنا اور مؤثر لائیبلٹی مینجمنٹ آپریشنز کے ذریعے کم لاگت پر نجی شعبے سے زیادہ سرمایہ کاری حاصل کرنا شامل ہے۔

یہ بات آئی ایم ایف کی منیجنگ ڈائریکٹر کرسٹالینا جارجیوا کے اس بیان میں سامنے آئی جو نارتھ کیرولائنا کے شہر ایش وِل میں ہونے والے جی ٹوئنٹی وزرائے خزانہ اور مرکزی بینکوں کے گورنرز کے اجلاس کے اختتام پر جاری کیا گیا۔

انہوں نے کہا کہ پائیدار قرضوں اور مضبوط اقتصادی نمو کو فروغ دینے والی اصلاحات کے لیے آئی ایم ایف اور عالمی بینک کے تین ستونوں پر مبنی طریقہ کار پر عمل درآمد تیز کرنا ایک اہم ترجیح ہے۔

کرسٹالینا جارجیوا کے مطابق آئی ایم ایف اور عالمی بینک نے اصلاحات پر عمل درآمد اور ملکی وسائل کو متحرک کرنے کے حوالے سے ممالک کے لیے تعاون مزید مضبوط کیا ہے۔ دونوں ادارے مؤثر لائیبلٹی مینجمنٹ آپریشنز کی حوصلہ افزائی کے طریقوں پر بھی کام جاری رکھے ہوئے ہیں، جن میں کم لاگت پر نجی شعبے سے زیادہ سرمایہ کاری کی حوصلہ افزائی شامل ہے۔ انہوں نے کہا کہ یہ طریقہ کار ایکواڈور اور پاکستان جیسے ممالک میں مؤثر ثابت ہوا ہے۔

انہوں نے کہا کہ دو طرفہ قرض دہندگان سمیت دیگر شراکت داروں کی مضبوط حمایت حاصل کرنا ضروری ہے اور جی ٹوئنٹی سے توقع ہے کہ وہ اقتصادی نمو اور سرمایہ کاری کے لیے اجتماعی تعاون میں قیادت کا کردار ادا کرے گا۔

آئی ایم ایف سربراہ نے کہا کہ حالیہ برسوں میں ابھرتی ہوئی اور کم آمدنی والی معیشتوں کے خودمختار قرضوں کی صورتحال ملکی پالیسی اقدامات اور عالمی تعاون کے باعث بتدریج بہتر ہوئی ہے، تاہم یہ پیش رفت یکساں نہیں رہی۔ عالمی معیشت میں مسلسل خطرات اور غیر یقینی صورتحال، خصوصاً ترقی یافتہ معیشتوں میں شرح منافع میں نمایاں اضافے کے اثرات، پالیسی نظم و ضبط اور مالیاتی تحفظات مضبوط بنانے کی اہمیت کو اجاگر کرتے ہیں۔

انہوں نے کہا کہ عالمی شرح سود میں اضافہ خاص تشویش کا باعث ہے۔ ترقی یافتہ معیشتوں میں شرح منافع کئی برس کی بلند سطح پر پہنچنے سے دنیا بھر میں شرح منافع میں اضافہ ہورہا ہے۔ بعض ابھرتی ہوئی مارکیٹوں میں اس اضافے نے حاصل کردہ اسپریڈ میں کمی کے فوائد کو بھی زائل کردیا ہے۔

ان کے مطابق بلند ری فنانسنگ ضروریات اور قرضوں کی بڑھتی ہوئی سروسنگ لاگت بالخصوص کم آمدنی والی ترقی پذیر معیشتوں کو متاثر کررہی ہے، جس سے بنیادی ڈھانچے، صحت اور تعلیم پر اہم اخراجات کے لیے دستیاب مالی گنجائش محدود ہورہی ہے۔ اس کے نتیجے میں اقتصادی نمو متاثر ہوتی ہے اور قرضوں کی پائیداری بھی کمزور پڑتی ہے۔

جارجیوا نے کہا کہ ان مشکلات میں بیرونی مالی معاونت میں نمایاں کمی بھی اضافہ کررہی ہے، جس میں سرکاری ترقیاتی امداد میں کمی اور پیرس کلب سے باہر کے قرض دہندگان کی جانب سے نئی مالی رقوم کی آمد میں نمایاں کمی شامل ہے۔

انہوں نے زور دیا کہ موجودہ عالمی ماحول میں ممالک کو اقتصادی نمو بڑھانے والے اخراجات کے لیے مالی گنجائش پیدا کرنے میں مدد دینا پہلے سے کہیں زیادہ ضروری ہوگیا ہے۔

کاپی رائٹ بزنس ریکارڈر، 2026