آبنائے ہرمز سے جہازوں کی آمدورفت سنگل ڈیجٹ تک محدود رہی

شپنگ ڈیٹا کے مطابق آبنائے ہرمز کے اہم بحری راستے سے جہازوں کی آمدورفت جمعرات کو گزشتہ روز کے مقابلے میں کم رہی۔ مشرق وسطیٰ میں بحری جہازوں کو درپیش خطرات پر تشویش بڑھ رہی ہے جبکہ امریکا اور ایران کے درمیان امن مذاکرات بدستور تعطل کا شکار ہیں۔

کپلر کے ڈیٹا کے مطابق جمعرات کو آبنائے ہرمز سے 7 کموڈیٹی جہاز گزرے، جو بدھ کے مقابلے میں نصف تعداد ہے۔ ان میں سے 4 جہاز آبنائے میں داخل ہوئے جبکہ 3 باہر نکلے۔ جنگ سے قبل دنیا بھر میں خام تیل اور مائع قدرتی گیس (ایل این جی) کی تقریباً 20 فیصد حصے کی ترسیل اسی آبی راستے سے ہوتی تھی۔

اعداد و شمار کے مطابق ان جہازوں میں کوئی بہت بڑے خام تیل بردار ٹینکر یا مائع قدرتی گیس کے ٹینکر شامل نہیں تھے۔

تاہم ایک بہت بڑا گیس کیریئر، جس میں پروپین اور بیوٹین لدا ہوا تھا، ایرانی راستے سے آبنائے ہرمز سے باہر نکلا۔