تنزید حسن کی سنچری، بنگلہ دیش نے آسٹریلیا کے خلاف 88 رنز کی برتری حاصل کرلی
- بنگلہ دیش 23 سال بعد آسٹریلیا میں پہلی ٹیسٹ سیریز کھیل رہا ہے
اوپنر تنزید حسن نے اپنے دوسرے ٹیسٹ میں پہلی سنچری اسکور کرتے ہوئے بنگلہ دیش کو آسٹریلیا کے خلاف سیریز کے پہلے ٹیسٹ کے دوسرے روز چائے کے وقفے تک 3 وکٹوں کے نقصان پر 286 رنز تک پہنچا دیا، جس کے نتیجے میں مہمان ٹیم کو پہلی اننگز میں 88 رنز کی برتری حاصل ہوگئی۔
بائیں ہاتھ کے بلے باز تنزید حسن نے 197 گیندوں پر 101 رنز بنائے اور آسٹریلیا کے خلاف اس کی سرزمین پر سنچری بنانے والے بنگلہ دیش کے پہلے بلے باز کا اعزاز حاصل کیا۔ وہ اسپنر ناتھن لائن کی گیند پر مچل اسٹارک کے ہاتھوں کیچ آؤٹ ہوئے۔
کپتان اور نمبر چار بلے باز نجم الحسین شانتو 79 رنز پر ناٹ آؤٹ تھے، جبکہ مشفق الرحیم 26 رنز پر کھیل رہے تھے۔آسٹریلیا کی جانب سے فاسٹ بولر جوش ہیزل ووڈ نے واحد وکٹ حاصل کی۔ انہوں نے مومن الحق کو 49 رنز پر وکٹ کے پیچھے کیچ کرایا۔
بنگلہ دیش نے دوسرے روز کا آغاز 96 رنز ایک وکٹ سے کیا۔ میزبان کپتان پیٹ کمنز نے ٹاس جیت کر پہلے بیٹنگ کا فیصلہ کیا تھا، تاہم آسٹریلیا پہلی اننگز میں 198 رنز پر آؤٹ ہوگیا تھا۔
بنگلہ دیش 23 سال بعد آسٹریلیا میں ٹیسٹ سیریز کھیل رہا ہے۔ سیریز کا دوسرا اور آخری ٹیسٹ 22 اگست سے کوئنزلینڈ کے شہر میکے میں کھیلا جائے گا۔
Comments