بلوچستان میں آپریشنز کے دوران 12 دہشت گرد ہلاک

سیکیورٹی فورسز نے انسدادِ دہشت گردی کی جاری مہم ردالفضل-3 کے تحت بلوچستان کے اضلاع واشک اور مستونگ میں دو مختلف انٹیلی جنس مبنی کارروائیوں میں 12 دہشت گردوں کو ہلاک کر دیا۔

آئی ایس پی آر کے مطابق 5 اگست کو ضلع واشک میں فورسز کی جانب سے دہشت گردوں کی نقل و حرکت کا سراغ ملنے پر کی گئی کارروائی میں 6 دہشت گرد ہلاک ہوئے۔ضلع مستونگ میں 6 اگست کو کی گئی ایک اور انٹیلی جنس مبنی کارروائی کے دوران شدید فائرنگ کے تبادلے کے بعد مزید 6 دہشت گرد مارے گئے۔

بیان کے مطابق آپریشن کے دوران دہشت گردوں کے ایک ٹھکانے کو بھی تباہ کر دیا گیا۔آئی ایس پی آر نے کہا کہ یہ کارروائیاں ملک سے دہشت گردوں اور غیر ملکی سرپرستی میں ہونے والی دہشت گردی کے خاتمے کے لیے جاری انسدادِ دہشت گردی مہم کا حصہ تھیں۔

وزیر اعظم شہباز شریف نے فتنتہ الہندوستان کے دہشت گردوں کے خلاف کامیاب کارروائیوں پر سیکیورٹی فورسز کو سراہا اور دونوں آپریشنز میں 12 دہشت گردوں کو جہنم واصل کرنے پر انہیں مبارکباد دی۔

وزیر اعظم نے کہا کہ سیکیورٹی فورسز عزمِ استحکام کے وژن کے تحت دہشت گردی کے خلاف نمایاں کامیابیاں حاصل کر رہی ہیں۔انہوں نے کہا ہم ملک سے ہر قسم کی دہشت گردی کا مکمل خاتمہ کرنے کے لیے پرعزم ہیں۔

وزیر اعظم نے سیکیورٹی فورسز کی قربانیوں کو خراجِ تحسین پیش کیا اور دہشت گردی کے ناسور کو ختم کرنے کے حکومتی عزم کا اعادہ کیا۔