حکومت نے پیٹرول 3.39 اور ڈیزل 4.07 روپے فی لیٹر سستا کر دیا

حکومت نے پیٹرول کی قیمت میں 3 روپے 39 پیسے فی لیٹر جبکہ ہائی اسپیڈ ڈیزل (ایچ ایس ڈی) کی قیمت میں 4 روپے 7 پیسے فی لیٹر کمی کر دی ہے، جس کا اطلاق بدھ 5 اگست سے ہوگا۔

وزارت توانائی (پیٹرولیم ڈویژن) کی جانب سے جاری نوٹیفکیشن کے مطابق آئل اینڈ گیس ریگولیٹری اتھارٹی (اوگرا) نے حکومت کے پیٹرولیم مصنوعات کی قیمتوں کے تعین کے طریقہ کار کے تحت منگل کو پیٹرولیم مصنوعات کی ایکس ڈپو قیمتوں میں رد و بدل کیا۔

نوٹیفکیشن کے مطابق موٹر اسپرٹ (پیٹرول) کی قیمت میں 3 روپے 39 پیسے فی لیٹر کمی کی گئی ہے، جس کے بعد اس کی قیمت 331 روپے 95 پیسے سے کم ہو کر 328 روپے 56 پیسے فی لیٹر ہو گئی ہے۔

ہائی اسپیڈ ڈیزل (ایچ ایس ڈی) کی قیمت میں بھی 4 روپے 7 پیسے فی لیٹر کمی کی گئی، جس کے بعد اس کی قیمت 389 روپے 93 پیسے سے کم ہو کر 385 روپے 86 پیسے فی لیٹر ہو گئی۔

نئی قیمتوں کا اطلاق فوری طور پر ہوگا اور یہ آئندہ قیمتوں کے جائزے تک نافذ العمل رہیں گی۔ گزشتہ جائزے میں بھی حکومت نے پیٹرول کی قیمت میں 4 روپے 8 پیسے فی لیٹر جبکہ ہائی اسپیڈ ڈیزل کی قیمت میں 2 روپے 45 پیسے فی لیٹر کمی کی تھی۔