شدید ترین ہیٹ ویو نے یورپ کو جکڑ لیا، فرانس میں ہلاکتیں بڑھنے کا خدشہ

یورپ کے متعدد حصوں میں درجہ حرارت 40 سینٹی گریڈ تک پہنچنے کی پیشگوئی کی گئی ہے جبکہ دیگر علاقوں میں طوفانی بارشوں کا سلسلہ شروع ہو گیا ہے۔ اس دوران فرانس نے ریکارڈ توڑ ہیٹ ویو کے دوران ایک ہزار اضافی ہلاکتوں کی تصدیق کی ہے۔

فرانسیسی پبلک ہیلتھ ایجنسی کے مطابق گرمی سے ہونے والی زیادہ تر اموات معمر افراد کی ہوئی ہیں اور خبردار کیا ہے کہ کیئر ہومز اور نجی گھروں سے ڈیٹا موصول ہونے کے بعد ہلاکتوں کی تعداد میں مزید اضافے کا خدشہ ہے۔ سائنسدانوں کا کہنا ہے کہ 20 جون سے شروع ہونے والی یہ ہیٹ ویو یورپ کی تاریخ کی بدترین لہر ہے جس نے بجلی کی پیداوار، بنیادی ڈھانچے اور نظامِ صحت کو شدید متاثر کیا ہے۔ ماہرین کے مطابق انسانی سرگرمیوں کے باعث ہونے والی ماحولیاتی تبدیلی (کلائمٹ چینج) کے بغیر ایسی شدید گرمی کا ہونا ناممکن تھا۔

اتوار کو جرمنی، پولینڈ اور اٹلی میں پارہ 40 ڈگری کو چھونے کی توقع ہے، جبکہ فرانس کے کچھ حصوں میں طوفان کے باعث بجلی اور آمدورفت کا نظام درہم برہم ہو گیا۔ شدید گرمی سے یورپی دریاؤں میں پانی کی سطح کم اور درجہ حرارت بڑھ گیا ہے، جس سے ہنگری کے نیوکلیئر پاور پلانٹ کی پیداوار میں کمی کا خدشہ ہے جبکہ اٹلی کے دریاؤں میں سمندری پانی داخل ہونے سے زراعت کو خطرات لاحق ہو گئے ہیں۔ پیاس بجھانے کی کوشش میں درجنوں افراد کے ڈوبنے کی بھی اطلاعات ہیں۔ فرانس میں اگرچہ گرمی کی شدت میں کچھ کمی آئی ہے، تاہم وزیرِ صحت کا کہنا ہے کہ ہیٹ ویو کے اثرات اگلے 10 روز تک برقرار رہ سکتے ہیں۔ طوفان کے باعث فرانس کے شمالی اور وسطی علاقوں میں 63 ہزار سے زائد گھر بجلی سے محروم ہیں۔