خطے میں کشیدگی کم ہونے کے بعد عالمی سطح پر تیل کی قیمتوں میں نمایاں کمی آئی ہے، وزیراعظم

وزیراعظم شہباز شریف نے کہا ہے کہ آج (جمعہ) پٹرولیم مصنوعات کی قیمتوں میں بڑی کمی کی جائے گی۔

قومی اسمبلی سے خطاب کرتے ہوئے وزیراعظم شہباز شریف نے کہا ہے کہ جنگ بندی اور امن کی جاری کوششوں سے ایران اور پاکستان کی معیشتوں پر مثبت اثرات مرتب ہونے کی توقع ہے۔ انہوں نے نشاندہی کی کہ کشیدگی میں کمی کے بعد عالمی سطح پر تیل کی قیمتوں میں نمایاں کمی آئی ہے۔

شہباز شریف نے یاد دلایا کہ حکومت نے خطے میں غیر یقینی صورتحال کے دوران بلند ایندھن کی قیمتوں اور مہنگائی کے اثرات سے صارفین کو ریلیف دینے کے لیے 128 ارب روپے خرچ کیے ہیں۔ انہوں نے اعلان کیا کہ پیٹرولیم مصنوعات کی قیمتوں میں نمایاں کمی کا اعلان آج کیا جائے گا۔

وزیرِ اعظم شہباز شریف نے اس اعتماد کا اظہار کیا کہ ایران اور امریکہ کے درمیان اسلام آباد مفاہمتی یادداشت پر دستخط کے بعد پاکستان اور ایران خوشحالی، اقتصادی تعاون اور مضبوط دوطرفہ تعلقات کے نئے دور میں داخل ہوں گے۔

انہوں نے کہا کہ پاکستان نے امن معاہدے کی سہولت کاری میں اپنے کردار کے باعث عالمی سطح پر پذیرائی حاصل کی ہے، انہوں نے اسے قوم کے لیے باعثِ فخر لمحہ قرار دیا۔

وزیر اعظم نے مزید کہا کہ اس امن معاہدے کو ممکن بنانے میں مدد کرنے پر پاکستان کو دنیا بھر میں سراہا جا رہا ہے ، یہ کامیابی ملک کی بڑھتی ہوئی سفارتی حیثیت کی عکاس ہے۔

وزیر اعظم نے خطے میں امن کے قیام کی کوششوں میں کلیدی کردار ادا کرنے پر چیف آف ڈیفنس فورسز فیلڈ مارشل سید عاصم منیر کا شکریہ ادا کیا۔ انہوں نے نائب وزیر اعظم اور وزیر خارجہ اسحاق ڈار اور وزیر داخلہ سید محسن نقوی کی خدمات کا بھی اعتراف کیا۔

انہوں نے اپوزیشن جماعتوں سے بھی مطالبہ کیا کہ وہ قومی یکجہتی کا پیغام دینے کے لیے حکومت کا ساتھ دیں اور کہا کہ یہ کامیابی پوری قوم کی ہے۔

وزیرِاعظم نے بتایا کہ ایک روز قبل انہیں ایرانی صدر مسعود پزشکیان کی ٹیلی فون کال موصول ہوئی جنہوں نے مشکل وقت میں ایران اور اس کے عوام کی حمایت کرنے پر پاکستان اور اس کے عوام کا شکریہ ادا کیا۔

وزیرِ اعظم نے کہا کہ میں نے ایرانی صدر کو پاکستان کے دورے کی دعوت دی ہے اور ان سے کہا ہے کہ پاکستان آمد پر پوری قوم ان کا گرم جوشی سے استقبال کرے گی۔ انہوں نے مزید بتایا کہ ایرانی صدر پزشکیان نے بھی انہیں ایران کے سپریم لیڈر آیت اللہ علی خامنہ ای کی نماز جنازہ میں شرکت کی دعوت دی ہے۔ انہوں نے یقین دلایا کہ ایک پاکستانی وفد جنازے میں شرکت کرے گا۔

وزیرِاعظم نے اقتصادی چیلنجز سے نمٹنے میں تعاون پر صوبائی حکومتوں کا شکریہ ادا کیا اور امن اقدام کی حمایت کرنے پر ایران، امریکہ، قطر، سعودی عرب، ترکیہ اور چین کے کردار کا اعتراف کیا۔

انہوں نے اس سفارتی کامیابی کو پاکستان کے لیے ایک تاریخی لمحہ قرار دیا اور اس عالمی احترام پر اظہارِ تشکر کیا جو ملک کو حاصل ہوا ہے۔