چیمپیئنز لیگ فائنل ہنگامے : فرانس میں تقریباً 900 افراد گرفتار

فرانس نے بتایا ہے کہ ہفتے کے آخر (ویکنڈ) پر پیرس سینٹ جرمین (پی ایس جی) کلب کے مسلسل دوسری بار باوقار چیمپیئنز لیگ جیتنے کے بعد بھڑک اٹھنے والے ہنگاموں میں تقریباً 900 افراد کو گرفتار کیا گیا ہے۔

وزیر داخلہ لارینٹ نونیز نے براڈکاسٹر فرانس انٹر کو بتایا کہ ہم نے 890 سے زائد گرفتاریاں کی ہیں۔ مجموعی طور پر یہ تعداد گزشتہ سال کے مقابلے میں 45 فیصد زیادہ ہے۔انہوں نے مزید بتایا کہ ہنگاموں میں قانون نافذ کرنے والے تقریباً 180 اہلکار زخمی بھی ہوئے۔پیرس اور دیگر شہروں میں نوجوانوں اور پولیس کے درمیان جھڑپوں، گاڑیوں کو آگ لگانے اور دکانوں کی لوٹ مار کی وجہ سے جیت کے جشن کا مزہ کرکرا ہو گیا۔اتوار کی شام صدر ایمانوئل میکرون نے ایلیزی پیلس (صدارتی محل) میں ٹیم کا استقبال کیا۔ جہاں انہوں نے ایک طرف پی ایس جی کو فرانس کے لیے باعثِ فخر قرار دیا، وہاں دوسری طرف انہوں نے اس ناقابلِ بیان تشدد کی شدید مذمت بھی کی۔علاوہ ازیں صدر میکرون نے کہا کہ بس بہت ہو گیا، ہم اب تنگ آ چکے۔ یہ فٹ بال نہیں نہ ہی یہ وہ کھیل ہے جس سے ہم محبت کرتے ہیں۔

حکام کے مطابق جشن کے دوران پیرس کی رنگ روڈ پر موٹر سائیکل چلاتے ہوئے ایک شخص ہلاک ہو گیا، جبکہ چاقو زنی اور دیگر حملوں کے واقعات بھی رپورٹ ہوئے ہیں۔