بھارت کا ویتنام کے ساتھ براہموس میزائلوں کی فروخت کا معاہدہ کرنے کا دعویٰ

بھارت کے دفاعی سیکریٹری راجیش کمار سنگھ نے ہفتے کے روز کہا ہے کہ بھارت نے ویتنام کے ساتھ ایک معاہدہ کیا ہے جس کے تحت اسے روس کے اشتراک سے تیار کردہ براہموس میزائل فراہم کیے جائیں گے، جبکہ انڈونیشیا کے ساتھ اسی نوعیت کے معاہدے پر بات چیت ”حتمی مراحل“ میں ہے۔

سنگھ نے یہ بات ایشیا کے سب سے بڑے دفاعی فورم، شنگری-لا ڈائیلاگ سے خطاب کرتے ہوئے کہی۔ انہوں نے کہا کہ بھارت جنوب مشرقی ایشیائی ممالک (آسیان) کے ساتھ مضبوط عزم رکھتا ہے، تاہم انہوں نے براہموس معاہدوں کی مزید تفصیلات ظاہر نہیں کیں۔

بھارت، جو اندرونِ ملک دفاعی پیداوار اور برآمدات کو فروغ دے رہا ہے، پہلے ہی فلپائن کو بھی سپرسانک کروز میزائل فروخت کر چکا ہے۔

رائٹرز کی ایک سابقہ رپورٹ کے مطابق ویتنام کے ساتھ یہ معاہدہ تقریباً 60 ارب روپے (تقریباً 62.9 کروڑ ڈالر) کا ہو سکتا ہے، جس میں تربیت اور لاجسٹک سپورٹ بھی شامل ہے۔