امریکا کا ایران پر نئی پابندیوں کا اعلان

امریکہ نے ایران کی فوجی نوعیت کی تیل تجارت پر نئی پابندیاں عائد کرنے کا اعلان کیا ہے حالانکہ دوسری جانب واشنگٹن اور تہران کے مابین جنگ بندی میں توسیع اور آبنائے ہرمز کے ذریعے بحری جہازوں کی آمد ورفت پر لگی پابندیاں ہٹانے کیلئے ایک عبوری معاہدہ طے پاچکا ہے۔

امریکی محکمہ خزانہ نے کہا ہے کہ اس نے8بحری جہازوں پر پابندیاں عائد کی ہیں جو ایرانی خام تیل اور پٹرولیم مصنوعات کو عالمی منڈیوں تک منتقل کرنے میں شامل تھے۔

ان بحری جہازوں میں مارشل آئی لینڈز کا پرچم بردار آئل ٹینکر فلورا ، کوموروس کا پرچم بردار خام تیل بردار ٹینکر ہوانکایو اور پاناما کا پرچم بردار ٹینکر ال گیپ شامل ہیں۔

امریکی صدر ڈونلڈ ٹرمپ نے ابھی تک جنگ بندی کے معاہدے کی منظوری نہیں دی ہے۔ اس تنازع نے ایران اور عمان کے درمیان واقع اس اہم آبنائے ہرمز کو بند کر کے عالمی منڈیوں کو شدید متاثر کیا ہے جہاں سے عام طور پر دنیا کا 20 فیصد تیل اور گیس گزرتا ہے۔

امریکہ نے 15 سے زائد کمپنیوں پر بھی پابندیاں عائد کر دیں جن میں ہانگ کانگ میں قائم ’ورتھ سین انرجی لمیٹڈ، دبئی کی سمفنی شپنگ اینڈ میری ٹائم مینجمنٹ انک اور ہانگ کانگ ہی کی مہدیوف ٹریڈنگ کمپنی شامل ہیں۔

امریکی محکمہ خزانہ نے کہا کہ پابندیوں کا نشانہ بننے والے بعض ایرانی ادارے ایران سے باہر سے پٹرولیم مصنوعات حاصل کرنے کے لیے ایرانی مسلح افواج کے آئل سیلز انفرااسٹرکچر کا استعمال بھی کرتے ہیں۔