پاکستان اور چین کے درمیان اقتصادی تعاون مزید مضبوط

پاکستان اور چین کے درمیان تجارت، سرمایہ کاری، زراعت، سائنس و ٹیکنالوجی، ماحولیاتی تبدیلی، تعلیم، میڈیا اور عوامی روابط سمیت مختلف شعبوں میں تعاون کو مزید فروغ دینے کے لیے متعدد معاہدوں، مفاہمتی یادداشتوں (ایم او یوز)، پروٹوکولز اور تعاون کی دستاویزات پر دستخط اور تبادلہ کیا گیا۔

وزیراعظم شہباز شریف اور عوامی جمہوریہ چین کے وزیراعظم لی چیانگ نے ان معاہدوں اور دستاویزات پر دستخط اور تبادلے کی تقریب کا مشاہدہ کیا۔ اس موقع پر دونوں ممالک کے اعلیٰ حکام بھی موجود تھے۔

دستخط ہونے والی اہم دستاویزات میں تعلیمی تعاون اور تبادلوں سے متعلق ایگزیکٹو پروگرام، خشک میوہ جات اور گری دار اجناس کے معائنے، قرنطینہ اور حفظان صحت کے تقاضوں سے متعلق پروٹوکول، مکئی کی فائیٹو سینیٹری ضروریات کا پروٹوکول، زرعی شعبے میں ترقیاتی تعاون کو مضبوط بنانے کی مفاہمتی یادداشت اور جانوروں کی ویکسینز سے متعلق لیٹر آف ایکسچینج شامل ہیں۔

اسی طرح اقتصادی ترقی کے شعبے میں تعاون کو فروغ دینے، ماحولیات اور ماحولیاتی تبدیلی، فارن سروس اکیڈمی اور چائنا فارن افیئرز یونیورسٹی کے درمیان تعاون، پاکستان نیشنل اسکول آف پبلک پالیسی اور کمیونسٹ پارٹی آف چائنا کی نیشنل اکیڈمی آف گورننس کے درمیان اشتراک سے متعلق ایم او یوز پر بھی دستخط کیے گئے۔

دونوں ممالک نے 2026 کے لیے انسانی وسائل کی ترقی کے مشترکہ پروگرام، کنفارمیٹی اسیسمنٹ، پاکستان سائنس فاؤنڈیشن اور چائنا ایسوسی ایشن آف سائنس اینڈ ٹیکنالوجی کے درمیان تعاون، سنہوا نیوز ایجنسی اور پاکستان براڈکاسٹنگ کارپوریشن کے درمیان اشتراک، جبکہ چائنا میڈیا گروپ اور پاکستان ٹیلی وژن کے درمیان مشترکہ ڈاکومنٹری کی تیاری سے متعلق معاہدوں پر بھی اتفاق کیا۔

اس کے علاوہ آزاد تجارت اور کثیرالجہتی نظام کی حمایت سے متعلق مفاہمتی یادداشت اور چین کے صوبہ ژیجیانگ اور پنجاب کے درمیان سسٹر صوبہ تعلقات کے قیام کی دستاویز کا بھی تبادلہ ہوا۔

وزیراعظم شہباز شریف نے کہا کہ ان معاہدوں پر دستخط پاکستان اور چین کے درمیان بڑھتے ہوئے اور متنوع تعاون کا مظہر ہیں، جو اہم شعبوں میں نئی شراکت داری کے دروازے کھولیں گے اور دونوں ممالک کے عوام کی فلاح و خوشحالی میں اہم کردار ادا کریں گے۔