حکومت کی سرمایہ کاروں اور کاروباری برادری کو مکمل تعاون کی یقین دہانی

حکومت نے جمعہ کو سرمایہ کاری کے ماحول کو سازگار بنانے اور کاروباری برادری کو ہر ممکن سہولتوں کی فراہمی کو یقینی بنانے کے اپنے عزم کا اعادہ کیا۔

اعلامیے کے مطابق وفاقی وزیر برائے پیٹرولیم علی پرویز ملک نے یہ بات لاہور چیمبر آف کامرس اینڈ انڈسٹری کے صدر فہیم الرحمان سے ایک ملاقات کے دوران کہی۔

ملاقات میں کاروباری ماحول، سرمایہ کاری میں سہولت کاری اور ملک میں توانائی کی فراہمی کی صورتحال سے متعلق امور پر تبادلہ خیال کیا گیا۔

وفاقی وزیر نے کہا کہ حکومت معاشی استحکام کو فروغ دینے، سرمایہ کاری کی حوصلہ افزائی کرنے اور متعلقہ اسٹیک ہولڈرز کے ساتھ ہم آہنگی کو مضبوط بنانے کے لیے عملی اقدامات کررہی ہے۔

اعلامیے کے مطابق ایل سی سی آئی کے صدر فہیم الرحمان نے وفاقی حکومت کی سفارتی کوششوں کو سراہا اور کہا کہ پاکستان نے موجودہ علاقائی صورتحال میں ذمہ دارانہ اور مؤثر سفارت کاری کا مظاہرہ کیا۔

صدر نے آبنائے ہرمز کی بندش کے باعث پیدا ہونے والے تعطل کے باوجود پٹرولیم کی فراہمی کے تسلسل کو یقینی بنانے اور صورتحال کو مؤثر طریقے سے سنبھالنے پر وزارت پٹرولیم کی کوششوں کو بھی سراہا۔

فہیم الرحمان نے سرمایہ کاری کے ماحول کو مزید بہتر بنانے اور صنعتوں کو درپیش کلیدی مسائل کے حل کے لیے کاروباری برادری کی جانب سے تجاویز اور سفارشات بھی پیش کیں۔