بھاری قیمت نہیں، کارکردگی اہم، جسٹن لینگر نے رشبھ پنت کے حق میں آواز اٹھا دی

آئی پی ایل کے موجودہ سیزن میں لکھنؤ سپر جائنٹس کی مسلسل چھٹی شکست نے ٹیم کی مشکلات میں اضافہ کر دیا ہے، تاہم ہیڈ کوچ جسٹن لینگر کا کہنا ہے کہ کپتان رشبھ پنت اپنی بھاری قیمت کے دباؤ میں نہیں ہیں۔

یاد رہے کہ لکھنؤ نے پنت کو 2024 میں 3.21 ملین ڈالرز کی خطیر رقم کے عوض حاصل کیا تھا، لیکن موجودہ سیزن ان کے لیے اب تک مایوس کن رہا ہے۔

ممبئی انڈینز کے خلاف شکست کے بعد گفتگو کرتے ہوئے جسٹن لینگر نے کہا کہ پنت کی کارکردگی کا پیسوں سے کوئی تعلق نہیں، قیادت ایک مشکل ذمہ داری ہے اور وہ ٹیم کا بوجھ مسکراہٹ کے ساتھ اٹھائے ہوئے ہیں۔ پنت نے اس سیزن کی 9 اننگز میں محض 128 کے اسٹرائیک ریٹ سے 204 رنز بنائے ہیں، جو ان کے قد کاٹھ کے مطابق کم ہیں۔

لینگر کے مطابق پنت نے ٹیم کی خاطر اپنی بیٹنگ پوزیشن بھی تبدیل کی، جو ان کے بے لوث جذبے کی عکاسی کرتا ہے۔ دوسری جانب ممبئی کے خلاف 228 رنز کا بڑا مجموعہ نہ بچ پانے پر رشبھ پنت نے مایوسی کا اظہار کرتے ہوئے کہا کہ ہم نے آغاز تو اچھا کیا لیکن آخر میں 10 سے 15 رنز کم رہ گئے تھے۔ لکھنؤ اس وقت پوائنٹس ٹیبل پر سب سے نیچے ہے اور اس کی پلے آف کی امیدیں دم توڑ رہی ہیں۔