حکومتی مداخلت کے بعد جاپانی ین کی قدر میں معمولی اضافہ

ایشیائی مارکیٹ میں کاروبار کے آغاز پر جاپانی کرنسی ین میں استحکام دیکھا گیا، جہاں گزشتہ ہفتے ممکنہ حکومتی مداخلت کے بعد اس کی قدر میں معمولی اضافہ ریکارڈ کیا گیا۔ ین 0.1 فیصد مضبوط ہو کر ڈالر کے مقابلے میں 156.885 پر آ گیا، جبکہ گزشتہ ایک ماہ کے دوران اس میں 1.4 فیصد اضافہ ہوا ہے، جس کی بڑی وجہ حالیہ حکومتی اقدامات کو قرار دیا جا رہا ہے۔

جاپانی حکام نے باضابطہ طور پر مداخلت کی تصدیق نہیں کی، تاہم ذرائع کے مطابق دو سال بعد پہلی بار ین کی خریداری کے ذریعے مارکیٹ میں دخل اندازی کی گئی۔ ماہرین کے مطابق یکطرفہ مداخلت کے اثرات محدود ہو سکتے ہیں اور اصل توجہ آئندہ ممکنہ اقدامات پر مرکوز ہے، خاص طور پر جب گولڈن ویک کے باعث جاپان میں تعطیلات اور کم لیکویڈیٹی کا سامنا ہے۔

دوسری جانب عالمی مارکیٹ میں محتاط رجحان برقرار رہا، خاص طور پر امریکی صدر ڈونلڈ ٹرمپ کے اس بیان کے بعد کہ امریکا آبنائے ہرمز میں پھنسے جہازوں کو نکالنے کے لیے اقدامات کرے گا۔

امریکی ڈالر انڈیکس مستحکم رہا، جبکہ آسٹریلوی اور نیوزی لینڈ ڈالر میں معمولی اضافہ دیکھا گیا۔ ریزرو بینک آف آسٹریلیا کے آئندہ پالیسی فیصلے میں شرح سود میں اضافے کی توقع ہے۔

یورو اور برطانوی پاؤنڈ میں بھی معمولی بہتری آئی، جبکہ کرپٹو کرنسی مارکیٹ میں بٹ کوائن اور ایتھریم کی قیمتوں میں محدود اتار چڑھاؤ دیکھا گیا۔