پی ایس ایل 11 کا فائنل آج : پشاور زلمی اور حیدرآباد کنگز مین مدمقابل ہوں گے

پاکستان کرکٹ بورڈ (پی سی بی) نے پاکستان سپر لیگ (پی ایس ایل) سیزن 11 کے فائنل کے لیے میچ آفیشلز کے ناموں کو حتمی شکل دے دی ہے، جہاں اتوار کو قذافی سٹیڈیم میں پشاور زلمی اور حیدرآباد کنگز مین کی ٹیمیں ٹائٹل کے لیے ٹکرائیں گی۔

قذافی اسٹیڈیم میں فائنل کے تمام انتظامات مکمل کر لیے گئے ہیں اور شائقین کو ہدایت کی گئی ہے کہ وہ شام 6 بجے تک اسٹیڈیم پہنچ جائیں۔ میچ سے قبل شام 6:30 بجے اختتامی تقریب منعقد ہوگی، جس میں مختلف فنکار اپنی پرفارمنس کا جادو جگائیں گے۔

فائنل جیتنے والی ٹیم کو 5 لاکھ ڈالر جبکہ رنر اپ ٹیم کو 3 لاکھ ڈالر بطور انعام دیے جائیں گے۔ اس کے علاوہ بہترین پلیئر ڈویلپمنٹ والی فرنچائز کے لیے بھی 2 لاکھ ڈالر کے اضافی انعام کا اعلان کیا گیا ہے۔

پی سی بی نے احسن رضا اور کرسٹوفر گیفانی کو آن فیلڈ امپائرز مقرر کیا ہے، جبکہ الیگزینڈر وارف تھرڈ امپائر اور آصف یعقوب فورتھ امپائر کے فرائض انجام دیں گے۔ سری لنکا سے تعلق رکھنے والے روشن ماہنامہ میچ ریفری ہوں گے۔

پشاور زلمی کی نظریں اپنے دوسرے پی ایس ایل ٹائٹل پر جمی ہیں جبکہ حیدرآباد کنگز مین پہلی بار چیمپئن بننے کے لیے پرعزم ہے۔ زلمی کے کپتان بابر اعظم اپنی قیادت میں پہلا پی ایس ایل فائنل جیتنے کے لیے ٹیم کی رہنمائی کریں گے۔ بابر اعظم جنہوں نے 2017 سے 2021 تک کراچی کنگز کی نمائندگی کے بعد 2022 میں زلمی میں شمولیت اختیار کی تھی، اس سے قبل 2020 میں اپنی سابقہ ٹیم کو فتح دلوا چکے ہیں۔

بابر اعظم اس سیزن میں شاندار فارم میں ہیں اور انہوں نے 10 میچوں میں 146 سے زائد کے اسٹرائیک ریٹ سے 588 رنز بنائے ہیں۔ لاہور میں فائنل سے قبل پریس کانفرنس کرتے ہوئے بابر اعظم نے ٹیم کے کامبینیشن اور مومنٹم پر اعتماد کا اظہار کرتے ہوئے کہا کہ ان کی کوشش ہوگی کہ منصوبوں پر صحیح معنوں میں عمل درآمد کر کے فائنل میں بہترین کارکردگی دکھائی جائے۔

دوسری جانب حیدرآباد کنگز مین کے کپتان مارنس لبوشین کا کہنا تھا کہ ان کی ٹیم اپنے طریقہ کار پر توجہ مرکوز کیے ہوئے ہے اور اس اہم میچ میں بھی اپنے طے شدہ پلان کے مطابق کھیلے گی۔ انہوں نے مزید کہا کہ کامیابی کے لیے اعتماد اور یقین بنیادی اہمیت رکھتے ہیں، ٹیم نے ٹورنامنٹ کے دوران بہت کچھ سیکھا ہے اور فائنل میں اپنی بہترین کرکٹ کھیلنے کی کوشش کرے گی۔