چین کی جانب سے امریکہ اور ایران کے درمیان رابطوں کے لیے پاکستان کی سفارتی کوششوں کی حمایت
- چینی سفیر کی نائب وزیراعظم اسحاق ڈار سے ملاقات، علاقائی صورتحال پر تبادلہ خیال
چینی سفیر جیانگ زیڈونگ نے منگل کو نائب وزیراعظم اور وزیر خارجہ سینیٹر محمد اسحاق ڈار سے ملاقات کی جس میں تازہ ترین علاقائی صورتحال پر تبادلہ خیال کیا گیا۔ دفتر خارجہ کے بیان کے مطابق ملاقات میں چینی سفیر جیانگ نے امریکہ اور ایران کے درمیان رابطوں کو فروغ دینے کے لیے پاکستان کی مسلسل کوششوں کی بھرپور حمایت اور تعریف کی۔
چینی سفیر نے نوٹ کیا کہ خطے اور اس سے باہر پائیدار امن و استحکام کو یقینی بنانے کے لیے اس طرح کے سفارتی اقدامات کلیدی اہمیت کے حامل ہیں۔ یہ پیش رفت ایک ایسے وقت میں سامنے آئی ہے جب پاکستان، امریکہ اور ایران کے درمیان ممکنہ امن معاہدے کے لیے مذاکرات کے ایک اور دور کی میزبانی کے لیے تیار ہے، جبکہ دو ہفتوں کی عارضی جنگ بندی کی مدت آج 21 اپریل کو ختم ہو رہی ہے۔
پاکستان اور چین کی ہر موسم میں آزمودہ اسٹریٹجک کوآپریٹو پارٹنرشپ کی توثیق کرتے ہوئے نائب وزیراعظم اسحاق ڈار نے دوطرفہ تعلقات کی پائیدار مضبوطی پر زور دیا۔ انہوں نے باہمی اسٹریٹجک مفادات کو مزید مستحکم کرنے کے لیے دونوں ممالک کے درمیان اعلیٰ سطح کے تبادلوں کو برقرار رکھنے کی اہمیت کو بھی اجاگر کیا۔
قبل ازیں اسحاق ڈار نے مصر کے وزیر خارجہ بدر عبدالعاطی سے بھی ٹیلیفونک رابطہ کیا اور تازہ ترین علاقائی حالات پر گفتگو کی۔ دونوں رہنماؤں نے امن و استحکام کے لیے مذاکرات اور روابط کی اہمیت پر زور دیا اور مستقبل میں قریبی رابطے میں رہنے پر اتفاق کیا۔
Comments