ایران سے مذاکرات: ٹرمپ کا وینس کو نہ بھیجنے کا اعلان، وائٹ ہاؤس کی تردید

وائٹ ہاؤس عہدیدار کا کہنا ہے کہ ایران سے مذاکرات کیلئے امریکی نائب صدر جے ڈی وینس پاکستان جائیں گے، اسٹیو وٹکوف اور جیرڈ کشنر بھی پاکستان جائیں گے۔

وائٹ ہاؤس کے ایک عہدیدار نے اتوار کو بتایا کہ امریکی نائب صدر جے ڈی وینس ایران کے ساتھ مذاکرات کے لیے پاکستان میں امریکی وفد کی قیادت کریں گے، یہ بیان صدر ڈونلڈ ٹرمپ کے اس اعلان کے کچھ ہی دیر بعد سامنے آیا جس میں انہوں نے خود یہ دورہ نہ کرنے کا کہا تھا۔

دن کے آغاز میں ٹرمپ نے اعلان کیا تھا کہ وہ مشرقِ وسطیٰ میں جاری تنازع جس کی جنگ بندی کی مدت جلد ختم ہونے والی ہے کے خاتمے کے حوالے سے تہران کے ساتھ ملاقاتوں کے لیے اپنے مذاکرات کار اسلام آباد بھیج رہے ہیں۔

تاہم صدر نے کہا کہ وینس جنہوں نے اسلام آباد میں تہران کے ساتھ مذاکرات کے پچھلے دور کی قیادت کی تھی مگر کسی معاہدے کے بغیر واپس آئے تھے، سکیورٹی خدشات کے باعث یہ دورہ نہیں کریں گے۔

ٹرمپ نے اے بی سی نیوز کو بتایا کہ یہ صرف سکیورٹی کی وجہ سے ہے، جے ڈی بہترین ہیں۔

لیکن جب ان تبصروں کے بارے میں پوچھا گیا تو وائٹ ہاؤس نے فوراً اپنا بیان بدل دیا۔

وائٹ ہاؤس کے ایک عہدیدار نے نام ظاہر نہ کرنے کی شرط پر اے ایف پی کو بتایا کہ وینس، خصوصی ایلچی اسٹیو وٹکوف اور ٹرمپ کے داماد جیرڈ کشنر ان مذاکرات میں شرکت کریں گے۔ یہ تینوں گزشتہ مرتبہ 11-12 اپریل کو ہونے والے مذاکرات میں بھی موجود تھے۔

دوسری جانب ایران کی تسنیم نیوز ایجنسی نے اتوار کو اپنے رپورٹر کے حوالے سے بتایا کہ جب تک بحری ناکہ بندی برقرار ہے، ایران نے فی الحال پاکستان میں مذاکراتی وفد بھیجنے کا کوئی فیصلہ نہیں کیا ہے۔