وزیراعظم شہباز شریف سعودی عرب اور قطر کے دورے مکمل کرنے کے بعد ترکیہ پہنچ گئے

وزیراعظم شہباز شریف جمعرات کو سعودی عرب اور قطر کے سرکاری دورے مکمل کرنے کے بعد ترکیہ پہنچ گئے۔ یہ تین ممالک پر مشتمل علاقائی دورہ پاکستان کی ان کوششوں کا حصہ ہے جن کا مقصد اقتصادی اور سفارتی تعلقات کو مضبوط بنانا ہے، جبکہ پاکستان مشرق وسطیٰ کے بحران کے خاتمے کے لیے بھی کردار ادا کرنے کی کوشش کر رہا ہے، جو فروری میں امریکہ اور اسرائیل کی جانب سے ایران پر حملوں کے بعد پیدا ہوا تھا۔

ترکیہ کی آمد پر وزیراعظم کا استقبال صوبہ انطالیہ کے گورنر حُلوسی شاہین نے کیا۔ پاکستان کے ترکیہ میں سفیر یوسف جنید اور سینئر سفارتی حکام بھی اس موقع پر موجود تھے۔

وزیراعظم آفس (پی ایم او) کے مطابق وزیراعظم جمعہ کو 5ویں انطالیہ ڈپلومیسی فورم میں شرکت کریں گے۔

فورم کے دوران وزیراعظم ”لیڈرز پینل“ میں شرکت کر کے پاکستان کا مؤقف پیش کریں گے۔

ایونٹ کے موقع پر وزیراعظم کی صدر رجب طیب اردوان اور دیگر اہم عالمی رہنماؤں کے ساتھ دوطرفہ ملاقاتیں بھی متوقع ہیں۔

نائب وزیراعظم و وزیر خارجہ سینیٹر اسحاق ڈار، وزیر اطلاعات و نشریات عطاء اللہ تارڑ، معاون خصوصی طارق فاطمی اور وزیراعظم کے بین الاقوامی میڈیا کے ترجمان محمد مشرف زیدی پاکستانی وفد کا حصہ ہیں۔

اس سے قبل جمعرات کو وزیراعظم شہباز شریف اور قطر کے امیر شیخ تمیم بن حمد آل ثانی نے مشرق وسطیٰ میں کشیدگی کم کرنے کی کوششوں کی حمایت اور علاقائی سلامتی و استحکام کے لیے بین الاقوامی رابطہ کاری بڑھانے کی اہمیت پر زور دیا تھا، خصوصاً توانائی کی سپلائی چینز کے تسلسل کو یقینی بنانے کے حوالے سے۔

دونوں رہنماؤں نے پاکستان اور قطر کے دوطرفہ تعلقات کا بھی جائزہ لیا اور انہیں مزید فروغ دینے کے طریقوں پر بات کی، خصوصاً سلامتی، دفاع اور توانائی کے شعبوں میں، تاکہ شراکت داری مضبوط ہو اور تعاون کے نئے مواقع پیدا ہوں۔