تین ملکی دورہ: علاقائی کشیدگی کے دوران وزیراعظم شہباز شریف جدہ پہنچ گئے
- وزیر اعظم پانچ روزہ دورے میں قطر اور ترکیہ بھی جائیں گے
وزیراعظم شہباز شریف اعلیٰ سطح کے وفد کے ہمراہ بدھ کے روز سعودی عرب کے دوطرفہ دورے پر جدہ پہنچ گئے ۔ یہ بات وزیراعظم کے دفتر نے ایک جاری بیان میں بتائی ہے۔
مکہ ریجن کے نائب گورنر شہزادہ سعود بن مشعل بن عبدالعزیز، سعودی عرب میں پاکستان کے سفیر احمد فاروق اور پاکستان میں سعودی سفیر نواف المالکی نے ایئرپورٹ پر ان کا پرتپاک استقبال کیا۔
وزیراعظم کے ہمراہ نائب وزیراعظم و وزیر خارجہ سینیٹر محمد اسحاق ڈار، وزیر اطلاعات و نشریات عطا اللہ تارڑ، وزیر اعظم کے معاونِ خصوصی سید طارق فاطمی سمیت دیگر اعلیٰ حکام بھی موجود ہیں۔
وزیراعظم اپنے پانچ روزہ سرکاری دورے کے دوران قطر اور ترکی کا بھی دورہ کریں گے۔
بدھ کے روز جاری بیان میں دفترِ خارجہ نے کہا ہے کہ سعودی عرب اور قطر کے دورے دوطرفہ نوعیت کے ہوں گے، جن کے دوران وزیراعظم دونوں ممالک کی قیادت سے ملاقاتیں کریں گے اور باہمی تعاون کے ساتھ ساتھ علاقائی امن و سلامتی پر تبادلہ خیال کریں گے۔
سعودی عرب کا یہ دورہ ایسے وقت میں ہو رہا ہے جب ریاض پاکستان کے لیے 3 ارب ڈالر کے اضافی ڈپازٹس کا اعلان کر چکا ہے اور موجودہ 5 ارب ڈالر کی سہولت میں مزید تین سال کی توسیع بھی کر دی گئی ہے۔
دریں اثنا، وزیراعظم شہباز شریف ترکی میں پانچویں انطالیہ ڈپلومیسی فورم میں بھی شرکت کریں گے۔
دفترِ خارجہ کے مطابق ”وہ عالمی رہنماؤں کے ہمراہ لیڈرز پینل میں شرکت کریں گے اور فورم میں پاکستان کا مؤقف پیش کریں گے۔“
وزیراعظم شہباز کی ترک صدر رجب طیب اردوان اور دیگر اہم عالمی رہنماؤں سے دوطرفہ ملاقاتیں بھی متوقع ہیں۔
فورم میں پاکستان کی شرکت عالمی امور پر تعمیری سفارت کاری، کثیرالجہتی تعاون اور مؤثر عالمی روابط کے لیے اس کے عزم کی عکاسی کرتی ہے۔
یہ دورہ اس لحاظ سے بھی اہم ہے کہ اسلام آباد میں امریکا اورایران کے مذاکرات کے غیر نتیجہ خیز دور کے بعد وزیراعظم کا یہ پہلا غیر ملکی دورہ ہوگا۔
Comments