سروس لانگ مارچ ٹائرز کا پی ایس ایکس میں 28 ملین ڈالر کا آئی پی او منصوبہ

سروس انڈسٹریز لمیٹڈ نے اعلان کیا ہے کہ اس کی ذیلی کمپنی سروس لانگ مارچ ٹائرز (پرائیویٹ) لمیٹڈ (ایس ایل ایم) پاکستان اسٹاک ایکسچینج میں ابتدائی عوامی پیشکش (آئی پی او) کے ذریعے 7.8 ارب روپے (تقریباً 28 ملین ڈالر) تک سرمایہ اکٹھا کرنے کا ارادہ رکھتی ہے۔

سروس انڈسٹریز لمیٹڈ نے منگل کے روز اسٹاک ایکسچینج کو ایک نوٹس کے ذریعے یہ اطلاع دی۔

نوٹس میں کہا گیا ہے کہ سروس لانگ مارچ ٹائرز لمیٹڈ (ایس ایل ایم)، جو ایک منسلک کمپنی ہے، نے پاکستان اسٹاک ایکسچینج کو حصص کی لسٹنگ کے لیے اپنا پراسپیکٹس جمع کرا دیا ہے۔

ایس ایل ایم کا منصوبہ آئی پی او کے ذریعے 5.6 سے 7.8 ارب روپے اکٹھا کرنا ہے، جس کے تحت 389.7 ملین عام حصص پیش کیے جائیں گے۔ فی حصص کم از کم قیمت 14.25 روپے مقرر کی گئی ہے، جو لسٹنگ کے بعد 5 فیصد حصص کی نمائندگی کرے گی۔

کمپنی کے مطابق آئی پی او سے حاصل ہونے والی رقم کو مسافر گاڑیوں کے ریڈیل ٹائرز کے منصوبے کے قیام کے لیے استعمال کیا جائے گا، جس کی مجموعی لاگت 22.5 ارب روپے تخمینہ لگائی گئی ہے۔ باقی مالی ضروریات طویل المدتی فنانسنگ اور کمپنی کے اندرونی وسائل سے پوری کی جائیں گی۔

ایس ایل ایم پاکستان میں آل اسٹیل ریڈیل ٹرک اور بس ٹائرز بنانے والی کمپنی ہے، جو سروس گروپ اور چین کی چاؤیانگ لانگ مارچ کے درمیان مشترکہ منصوبے کے طور پر قائم کی گئی ہے۔

سروس انڈسٹریز لمیٹڈ اور اس کی ذیلی کمپنی سروس گلوبل فٹ ویئر لمیٹڈ کے پاس بالترتیب 32.09 فیصد اور 18.91 فیصد حصص موجود ہیں۔

چند روز قبل ایس ایل ایم نے پاکستان میں 12 کروڑ ڈالر کی سرمایہ کاری کا اعلان کیا تھا، جس سے ملک کی صنعتی اور معاشی صلاحیت پر اعتماد ظاہر کیا گیا۔

چینی وفد نے بتایا تھا کہ کمپنی جون 2026 تک 7 کروڑ ڈالر کی برآمدات کا ہدف رکھتی ہے جبکہ اگلے مالی سال میں یہ ہدف 10 کروڑ ڈالر سے تجاوز کرنے کی کوشش کی جائے گی۔

جنوری میں چینی کمپنی نے سندھ کے علاقے نوری آباد میں مسافر گاڑیوں کے ریڈیل ٹائرز کے پلانٹ کے قیام کے لیے 8 کروڑ ڈالر کی سرمایہ کاری کی منظوری دی تھی۔