ٹرمپ نے پاکستان کی درخواست پر ایران پر حملے روک دیے، دو ہفتوں کی جنگ بندی کا اعلان

امریکی صدر ڈونلڈ ٹرمپ نے اعلان کیا کہ انہوں نے پاکستان کی درخواست پر ایران کے ساتھ دو ہفتوں کی جنگ بندی پر اتفاق کر لیا۔

یہ اعلان تہران کو دی گئی اس ڈیڈ لائن سے دو گھنٹے قبل سامنے آیا جس میں کہا گیا تھا کہ ایران آبنائے ہرمز کو دوبارہ کھول دے ورنہ اسے اپنے سویلین انفرااسٹرکچر پر وسیع پیمانے پر حملوں کا سامنا کرنا پڑے گا۔

سوشل میڈیا پر کیا گیا یہ اعلان ٹرمپ کی جانب سے سخت دھمکیوں سے پیچھے ہٹنے کی ایک اور مثال ہے، کیونکہ اسی دن انہوں نے ایران کو خبردار کیا تھا کہ اگر ان کے مطالبات پورے نہ کیے گئے تو آج رات ایک پوری تہذیب ختم ہو جائے گی۔

ٹرمپ نے کہا کہ یہ معاہدہ اس شرط سے مشروط ہے کہ ایران آبنائے ہرمز کے ذریعے تیل اور گیس کی ترسیل پر اپنی پابندی معطل کرے، جہاں سے عموماً دنیا کی تقریباً 20 فیصد حصے کی تیل سپلائی گزرتی ہے۔

انہوں نے اپنے سوشل میڈیا پلیٹ فارم ٹروتھ سوشل پر لکھا کہ یہ ایک دو طرفہ جنگ بندی ہوگی! انہوں نے مزید کہا کہ اس اقدام کی وجہ یہ ہے کہ امریکا اپنے تمام فوجی مقاصد حاصل کر چکا ہے اور ایران کے ساتھ طویل مدتی امن اور مشرقِ وسطیٰ میں استحکام کے حوالے سے ایک حتمی معاہدے کے قریب پہنچ چکا ہے۔

ٹرمپ کے مطابق ایران نے 10 نکات پر مشتمل ایک تجویز پیش کی ہے جو مذاکرات کے لیے ایک قابلِ عمل بنیاد فراہم کرتی ہے، اور انہیں امید ہے کہ دو ہفتوں کی جنگ بندی کے دوران ایک حتمی معاہدہ طے پا جائے گا۔