جیٹ فیول کی قیمتوں میں اضافے کے بعد پی آئی اے کے آپریشنز محدود، تمام رعایتیں ختم

پاکستان انٹرنیشنل ایئر لائنز (پی آئی اے) کی انتظامیہ نے بین الاقوامی مارکیٹ میں تیل کی قیمتوں میں اضافے کے پیشِ نظر تمام رعایتیں ختم کرنے کا فیصلہ کیا ہے۔

قومی کیریئر کے بقول یہ فیصلہ پیر کے روز ایک اعلیٰ سطح کے اجلاس میں کیا گیا، جس میں مسلسل بڑھتی قیمتوں اور ممکنہ نقصانات سے نمٹنے کے لیے منصوبہ بندی کی گئی۔

بیان میں کہا گیا ہے کہ ”پی آئی اے نے تمام رعایتیں ختم کرنے کا پالیسی فیصلہ کیا ہے۔ صرف شیرخوار اوردیگر بچوں کے لیے خصوصی رعایت برقرار رہے گی۔“

قومی کیریئر نے بیجنگ اور کوالالمپور کے لیے اپنی پروازیں بالترتیب 11 اپریل اور 14 اپریل سے معطل کرنے کا بھی اعلان کیا ہے۔

بیان میں مزید کہا گیا ہے کہ ”متحدہ عرب امارات اور سعودی عرب کے علاوہ دیگر خلیجی ممالک کے لئے پروازیں بھی اپریل کے آخر تک معطل کی جارہی ہیں۔“

پی آئی اے نے بتایا ہے کہ متحدہ عرب امارات کا فضائی آپریشن ہفتے میں 16 پروازوں تک محدود ہے۔

پی آئی اے انتظامیہ کا کہنا ہے کہ یہ فیصلہ جیٹ فیول کی قیمت میں اضافے کے بعد کیا گیا ہے۔

پی آئی اے کے ترجمان نے کہا کہ ایندھن کی قیمتوں میں اضافے کا سارا بوجھ مسافروں پر نہیں ڈالا جا سکتا، کچھ سخت انتظامی فیصلے کیے گئے ہیں۔

اہلکار نے مزید کہا کہ ”امید ہے کہ بین الاقوامی قیمتیں جلد ہی معمول کی سطح پر آ جائیں گی، جس کے بعد تمام متاثرہ راستے بحال ہو جائیں گے۔“

یہ اعلان ایران پر امریکی اور اسرائیلی فضائی حملوں کے درمیان سامنے آیا ہے، جس نے پورے مشرق وسطیٰ میں ہوا بازی میں خلل ڈالا، کئی ایئر لائنز نے خطے میں فضائی حدود سے بچنے کے لیے اپنی پروازیں منسوخ کری ہیں۔

آبنائے ہرمز 28 فروری کو ایران کے خلاف امریکا اور اسرائیل کی جنگ شروع ہونے کے بعد ایران کے جوابی حملوں کی وجہ سے جہاز رانی کے لئے بڑی حد تک بند ہے، جہاں سے عراق، سعودی عرب، قطر، کویت اور متحدہ عرب امارات سے خام تیل اور دیگر پیٹرولیم مصنوعات کی سپلائی گزرتی ہے۔