ایران کو امریکا سے مذاکرات کی کوئی ضرورت نہیں، عباس عراقچی

ایران کے وزیر خارجہ عباس عراقچی نے کہا ہے کہ تہران کو امریکا کے ساتھ مذاکرات میں کوئی دلچسپی نہیں اور ایران جنگ کے خاتمے کے لیے کسی معاہدے کی کوشش نہیں کر رہا۔ انہوں نے امریکی صدر ڈونلڈ ٹرمپ کے اس بیان کو مسترد کر دیا جس میں کہا گیا تھا کہ ایران معاہدہ کرنا چاہتا ہے۔

امریکی ٹی وی پروگرام فیس دی نیشن کو دیے گئے ایک انٹرویو میں عباس عراقچی نے کہا کہ ایران مضبوط اور مستحکم ہے اور اس وقت صرف اپنے عوام کے دفاع پر توجہ دے رہا ہے۔ ان کے مطابق ایران کو امریکا کے ساتھ بات چیت کی کوئی وجہ نظر نہیں آتی کیونکہ جب دونوں ممالک کے درمیان مذاکرات جاری تھے تو اسی دوران امریکا نے ایران پر حملہ کر دیا۔

انہوں نے کہا کہ امریکا کے ساتھ مذاکرات کا تجربہ اچھا نہیں رہا، اسی لیے ایران فی الحال واشنگٹن کے ساتھ کسی قسم کی بات چیت کا ارادہ نہیں رکھتا۔ عباس عراقچی کے مطابق ایران نے کبھی جنگ بندی یا مذاکرات کی درخواست بھی نہیں کی۔

دوسری جانب صدر ڈونلڈ ٹرمپ نے ہفتے کے روز کہا تھا کہ ایران معاہدہ کرنا چاہتا ہے، تاہم موجودہ شرائط کے تحت وہ کسی معاہدے کے لیے تیار نہیں ہیں۔

ایرانی وزیر خارجہ نے مزید کہا کہ ایران ان ممالک سے بات چیت کے لیے تیار ہے جو اپنے تیل بردار جہازوں کے لیے آبنائے ہرمز کے ذریعے محفوظ گزرگاہ چاہتے ہیں۔ ان کے مطابق کئی ممالک نے اپنے جہازوں کی محفوظ آمد و رفت کے لیے ایران سے رابطہ کیا ہے، تاہم انہوں نے کسی خاص ملک کا نام نہیں بتایا۔