ایس ای سی پی نے نئی انوٹی مصنوعات کی منظوری دے دی
- فیصلہ انشورنس سیکٹر کے اسٹیک ہولڈرز کے ساتھ مشاورت کے بعد کیا گیا ہے
سیکیورٹیز اینڈ ایکسچینج کمیشن آف پاکستان (ایس ای سی پی) نے جمعہ کو ریٹائرمنٹ کے بعد آمدنی کے تحفظ کو یقینی بنانے اور ملک میں اینوٹی (سالانہ وظیفہ) مارکیٹ کے فروغ کے لیے متعدد نئی انوٹی پروڈکٹ کی منظوری دے دی ہے۔
منظور شدہ مصنوعات میں لائف کنٹنجنٹ انیوٹیز (حیاتیاتی بنیاد پر وظیفہ)، ڈیفرڈ انیوٹیز (مؤخر وظیفہ)، گارنٹی شدہ ادائیگیوں والی انیوٹیز اور ہائبرڈ انیوٹی ڈھانچے شامل ہیں جو گارنٹی شدہ اور تاحیات آمدنی کے فوائد کو یکجا کرتے ہیں۔
اعلامیے کے مطابق یہ مصنوعات ریٹائر ہونے والے افراد کو اپنی جمع شدہ بچتوں کو ریٹائرمنٹ کے بعد مستقل اور مستحکم آمدنی کے سلسلے میں تبدیل کرنے میں مدد دیں گی جس سے زندگی کے آخری سالوں میں مالی غیر یقینی صورتحال کم ہو جائے گی۔
یہ فیصلہ انشورنس سیکٹر کے اسٹیک ہولڈرز کے ساتھ مشاورت کے بعد کیا گیا ہے، جو پاکستان کے ریٹائرمنٹ فریم ورک میں موجود ایک بڑی کمی کو پورا کرتا ہے۔
ایس ای سی پی کے مطابق روایتی طور پر ملک میں ریٹائرمنٹ سیونگ مصنوعات کی تمام تر توجہ صرف انسان کی عملی زندگی کے دوران بچت جمع کرنے پر رہی ہے، جبکہ ان بچتوں کو ریٹائرمنٹ کے بعد مستقل آمدنی میں تبدیل کرنے کے لیے بہت محدود آپشنز دستیاب رہے ہیں۔
کمیشن نے نوٹ کیا کہ اس خلا کی وجہ سے ریٹائر ہونے والے افراد کے لیے مالی خطرات میں اضافہ ہوا ہے.
ایس ای سی پی نے مزید کہا کہ نئی منظور شدہ انیوٹی مصنوعات ریٹائرمنٹ کے بعد آمدنی کے لچکدار انتخاب فراہم کرنے کے لیے ڈیزائن کی گئی ہیں۔
Comments
Comments are closed.