ایس این جی پی ایل نے ایگری ٹیک یوریا پلانٹ کو گیس کی فراہمی بحال کر دی

کھاد تیار کرنے والے بڑے ادارے ایگری ٹیک لمیٹڈ نے جمعہ کو اعلان کیا ہے کہ سوئی ناردرن گیس پائپ لائنز لمیٹڈ (ایس این جی پی ایل) کی جانب سے ایگری ٹیک یوریا پلانٹ کو گیس کی فراہمی بحال کردی گئی ہے۔

کمپنی نے پاکستان اسٹاک ایکسچینج کو بھیجے گئے ایک نوٹس میں اس معلومات سے آگاہ کیا۔

کمپنی نےمطلع کیا ہے کہ ہمارے یوریا پلانٹ کے آپریشنز اب اسی مناسبت سے دوبارہ شروع ہوجائیں گے۔

4 مارچ کو کمپنی نے اپنا یوریا پلانٹ اس وقت بند کردیا تھا جب ایس این جی پی ایل نے مشرقِ وسطیٰ میں جاری جنگ کے باعث پیدا ہونے والے تعطل کا حوالہ دیتے ہوئے ایل این جی کی سپلائی پر فورس میجر (ناگزیر حالات/ ہنگامی صورتحال) کے ممکنہ اطلاق کا نوٹس جاری کیا تھا۔

یہ پیشرفت اس وقت سامنے آئی جب زیادہ تر ٹینکر مالکان، بڑی آئل کمپنیوں اور تجارتی گھرانوں نے آبنائے ہرمز کے ذریعے خام تیل، ایندھن اور ایل این جی کی ترسیل معطل کر دی تھی۔

ایگری ٹیک لمیٹڈ کو 1959 میں پاک امریکن فرٹیلائزرز لمیٹڈ کے نام سے پاکستان میں رجسٹر کیا گیا تھا۔

یہ کمپنی یوریا اور گرینیولیٹڈ سنگل سپر فاسفیٹ (جی ایس ایس پی) کھاد کی تیاری اور فروخت کے کاروبار سے وابستہ ہے اور اس کی مصنوعات کھاد کی مارکیٹ میں تارا کے برانڈ نام سے فروخت کی جاتی ہیں۔