آپریشن ”غضب للحق“ جاری، 464 افغان طالبان ہلاک، 665 سے زائد زخمی ہوئے، وزیر اطلاعات
- فضائی کارروائیوں کے ذریعے افغانستان کے 56 مختلف مقامات کو موثرطور پر نشانہ بنایا گیا ہے، ذرائع کا دعویٰ
وفاقی وزیر اطلاعات و نشریات عطا اللہ تارڑ نے منگل کے روز کہا ہے کہ پاکستان کی سیکیورٹی فورسز نے ”آپریشن غضب للحق“ کو مزید تیز کر دیا ہے، جس کے نتیجے میں 464 افغان طالبان ہلاک جبکہ 665 سے زائد زخمی ہوئے ہیں۔
عطا تارڑ نے سماجی رابطے کی ویب سائٹ ایکس پر لکھا ہے کہ جاری آپریشن کے دوران افغان طالبان کے 188 چیک پوسٹ تباہ کیے گئے جبکہ 31 پوسٹوں پر قبضہ کرلیا گیا ہے۔
انہوں نے مزید دعویٰ کیا کہ فوجی کارروائی کے دوران 192 ٹینک، بکتر بند گاڑیاں اور توپیں تباہ کر دی گئی ہیں۔
وزیر اطلاعات کے مطابق فضائی کارروائیوں کے ذریعے افغانستان کے 56 مختلف مقامات کو موثر طور پر نشانہ بنایا گیا ہے۔
یہ تازہ ترین اطلاعات ایسے وقت میں سامنے آئیں جب پاکستان اور افغانستان سرحد پر کشیدگی عروج پر ہے اور سیکیورٹی فورسز دشمن کے ٹھکانوں کے خلاف آپریشن جاری رکھے ہوئے ہیں۔
دن کے ابتدائی حصے میں، وزیر اطلاعات عطا اللہ تارڑ نے کہا کہ سیکیورٹی فورسز نے رات بھر بلوچستان اور خیبر پختونخوا میں افغان طالبان کی جانب سے کیے گئے بڑے پیمانے پر حملوں کو کامیابی سے پسپا کر دیا۔
ایک آپریشنل اپ ڈیٹ میں وزیر نے بتایا کہ جھڑپوں کے دوران کم از کم 67 افغان طالبان جنگجو ہلاک ہوئے۔
انہوں نے مزید کہا کہ ایک فوجی شہید اور پانچ دیگر زخمی ہوئے ہیں۔
Comments