پاکستان کی فضائی حدود مکمل طور پر فعال اور محفوظ ہے، پی اے اے

پاکستان ائرپورٹس اتھارٹی (پی اے اے) نے ہفتے کو کہا ہے کہ پاکستان کی فضائی حدود تمام پروازوں کے لیے مکمل طور پر فعال اور محفوظ ہے، دوسری جانب ایرانی حکام نے تہران کی فضائی حدود کو کئی گھنٹوں کیلئے عارضی طور پر بند کردیا ہے۔

پاکستان ایئرپورٹس اتھارٹی نے ایک بیان میں کہا کہ ایرانی حکام کی جانب سے جاری نوٹم کے مطابق تہران کی فضائی حدود آج صبح 11:30 سے شام 5:00 بجے تک تک سویلین طیاروں کے لیے بند رہے گی، اس دوران عام طور پر مشرق سے مغرب کی جانب محدود عبوری پروازیں ہی گزرتی ہیں۔

اگر ایرانی حکام نے اس نوٹم کی مدت شام 5 بجے کے بعد بھی بڑھانے کا فیصلہ کیا، تو ہم توقع کرتے ہیں کہ پاکستانی فضائی حدود سے گزرنے والی پروازوں کی آمد و رفت میں نمایاں اضافہ ہو جائے گا۔ یہ اضافہ خاص طور پر معمول کے رات کے اوقات میں ہو گا کیونکہ ایئر لائنز بند ایرانی فضائی حدود سے بچنے کے لیے اپنی طویل فاصلے کی بین الاقوامی پروازوں کے شیڈول میں تبدیلی کریں گی۔

اعلامیے کے مطابق ایئر ٹریفک کنٹرول مکمل طور پر تیار ہے اور تمام آپریشنز معمول کے مطابق جاری ہیں۔ اس وقت کسی قسم کی تاخیر، پابندی یا حفاظتی خدشات کی نہ تو کوئی اطلاع ملی ہے اور نہ ہی ایسی کسی صورتحال کی توقع ہے۔

یہ بیان ہفتے کو امریکہ اور اسرائیل کی جانب سے ایران پر کیے گئے حملوں کے بعد سامنے آیا ہے، جس نے مشرقِ وسطیٰ کو ایک بار پھر فوجی تصادم کی طرف دھکیل دیا ہے اور تہران کے مغرب کے ساتھ طویل عرصے سے جاری جوہری تنازع کے سفارتی حل کی امیدوں کو مزید مدھم کر دیا ہے۔

پاکستان ایئرپورٹس اتھارٹی نے کہا ہے کہ وہ ایوی ایشن سیفٹی اور سیکیورٹی کے اعلیٰ ترین معیار برقرار رکھنے کے لیے پرعزم ہے اور اس سلسلے میں قومی و بین الاقوامی شراکت داروں کے ساتھ قریبی رابطے میں ہے۔