ایس ای سی پی کی غیر فہرست شدہ کمپنیوں کے شیئرز کی ملکیت کو مکمل ڈیجیٹل کرنے کی منظوری

سیکیورٹیز اینڈ ایکسچینج کمیشن آف پاکستان (ایس ای سی پی) نے غیر فہرست شدہ (ان لسٹڈ) کمپنیوں کے حصص (شیئرز) کی ملکیت کو مکمل طور پر ڈیجیٹل کرنے کے اصلاحات کے دوسرے مرحلے کا آغاز کر دیا ہے۔ اس اقدام کے تحت کاغذی سرٹیفکیٹس کو سینٹرل ڈپازٹری سسٹم (سی ڈی ایس) کے ذریعے الیکٹرانک فارم میں تبدیل کیا جائے گا۔

اس تبدیلی کا مقصد کاغذی سرٹیفکیٹس کے گم ہونے، چوری، نقصان اور جعل سازی جیسے خطرات کو ختم کرنا ہے، جو اکثر طویل عدالتی تنازعات کا باعث بنتے ہیں۔ ڈیجیٹل حصص نہ صرف شفافیت اور سیکیورٹی کو یقینی بنائیں گے بلکہ ان کے ذریعے فنانسنگ کے لیے حصص کو بطور ضمانت رکھنا بھی آسان ہو جائے گا۔

نئی پالیسی کے تحت تمام موجودہ غیر فہرست شدہ کمپنیوں کے لیے ضروری ہوگا کہ وہ حصص کی کسی بھی منتقلی، الاٹمنٹ یا خرید و فروخت سے پہلے اپنے جسمانی شیئرز کو الیکٹرانک شکل میں تبدیل کریں۔

یاد رہے کہ ایس ای سی پی پہلے ہی نئی رجسٹرڈ ہونے والی کمپنیوں کے لیے صرف ڈیجیٹل شیئرز کا اجرا لازمی قرار دے چکا ہے۔ یہ اقدام پاکستان کے کارپوریٹ سیکٹر کو جدید بنانے، سرمایہ کاروں کے تحفظ اور کاروبار میں آسانی پیدا کرنے کی جانب ایک بڑا قدم ہے۔