فیلڈ مارشل سید عاصم منیر کا مظفرآباد کا دورہ، مسئلہ کشمیر پر حمایت کا اعادہ

چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے جمعرات کو مظفرآباد کا دورہ کیا، جہاں انہوں نے تحریکِ آزادیِ کشمیر کے شہداء کو خراجِ عقیدت پیش کیا اور مقبوضہ کشمیر کے عوام کے لیے پاکستان کی غیر متزلزل حمایت کا اعادہ کیا۔

آئی ایس پی آر کے مطابق آرمی چیف نے جموں و کشمیر کے شہداء کی یادگار پر پھولوں کی چادر چڑھائی اور شہداء کی جرات اور بے مثال قربانیوں کے لازوال ورثے کو خراجِ تحسین پیش کیا۔

مقامی معززین اور سابق فوجیوں سے گفتگو کرتے ہوئے فیلڈ مارشل عاصم منیر نے کشمیری عوام کے لیے پاکستان کی سیاسی، اخلاقی اور سفارتی حمایت کا اعادہ کیا۔ انہوں نے کہا کہ مقبوضہ کشمیر میں انسانی حقوق کی مسلسل خلاف ورزیاں اور ہندوتوا کے زیرِ اثر ہونے والے مظالم کشمیری عوام کی جائز امنگوں کو دبانے میں ناکام رہے ہیں۔

پاکستان کے دیرینہ موقف کو دہراتے ہوئے آرمی چیف نے کہا کہ کشمیر اپنے عوام کی مرضی کے مطابق آزادی کی سحر ضرور دیکھے گا۔ انہوں نے مزید کہا کہ پاکستان اقوام متحدہ کی سلامتی کونسل کی قراردادوں کے مطابق منصفانہ حل کے حصول تک تمام متعلقہ عالمی فورمز پر مسئلہ کشمیر اٹھاتا رہے گا۔

آرمی چیف نے مشکل حالات کے باوجود کشمیر میں تعینات افسران اور جوانوں کے جذبے، بلند حوصلے اور پیشہ ورانہ تیاریوں کی تعریف کی۔ انہوں نے کسی بھی دشمنانہ کارروائی کو روکنے اور اس کا جواب دینے کے لیے ہر وقت چوکنا رہنے اور بھرپور ہم آہنگی برقرار رکھنے کی اہمیت پر زور دیا۔

بعد ازاں فیلڈ مارشل سید عاصم منیر نے ایک فارورڈ پوسٹ کا دورہ کیا اور اگلے مورچوں پر تعینات جوانوں سے ملاقات کی۔ انہوں نے خبردار کیا کہ کسی بھی جارحیت کا بھرپور اور منہ توڑ جواب دیا جائے گا اور مسلح افواج ابھرتی ہوئی سکیورٹی صورتحال میں روایتی اور ہائبرڈ دونوں طرح کے خطرات کا مقابلہ کرنے کے لیے مکمل طور پر تیار ہیں۔

مظفرآباد آمد پر کمانڈر راولپنڈی کور نے آرمی چیف کا استقبال کیا۔