لیبیا، طویل حکمرانی کرنے والے معمر قذافی کا بیٹا انتقال کرگیا

لیبیا کے طویل عرصے تک حکمران رہنے والے معمر قذافی کے بیٹے سیف الاسلام قذافی انتقال کر گئے، یہ اطلاع ان کے رشتہ داروں نے منگل کو دی، تاہم موت کی تفصیلات فراہم نہیں کی گئیں۔

ان کے مشیر عبداللہ عثمان عبدالرحیم نے سوشل میڈیا پوسٹ میں ان کی موت کی تصدیق کی، مگر مزید وضاحت نہیں دی۔ ان کے کزن حمید قذافی نے لیبیا کے نیٹ ورک ال احرار سے کہا کہ سیف الاسلام شہادت کے رتبے پر فائز ہو گئے، اور بتایا کہ خاندان کے پاس مزید معلومات نہیں ہیں۔

میڈیا رپورٹس کے مطابق وہ شمال مغربی لیبیا کے شہر زنتان میں انتقال کر گئے، اگرچہ ان کی موجودگی طویل عرصے سے نا معلوم تھی۔

53 سالہ سیف الاسلام کو اپنے والد کے جانشین کے طور پر دیکھا جاتا تھا۔ شمالی افریقہ کے اس ملک میں اپنے والد کے دور حکومت کے دوران انہوں نے کوئی سرکاری عہدہ نہیں رکھا، لیکن انہیں لیبیا کا غیر اعلانیہ وزیراعظم قرار دیا گیا، اور 2011 کی عرب بہار سے قبل انہوں نے اعتدال پسندی اور اصلاحات کی تصویر قائم کی تھی۔

تاہم، عرب بہار کے دوران انہوں نے خون کی ندیاں بہانے کا وعدہ کیا، جس کے بعد ان کی یہ شہرت ختم ہو گئی۔

انہیں نومبر 2011 میں جنوبی لیبیا میں بین الاقوامی فوجداری عدالت کے وارنٹ کے بعد گرفتار کیا گیا۔

2015 میں انہیں تیز رفتار مقدمے کے بعد موت کی سزا سنائی گئی، تاہم بعد میں معافی دی گئی۔ 2021 میں انہوں نے صدارتی انتخاب میں حصہ لینے کا اعلان کیا، لیکن انتخابات غیر معینہ مدت کے لیے مؤخر کر دیے گئے۔