مجھے شکست دینا مشکل ہوگا ، آسٹریلین اوپن کے انڈر ڈاگ میدویدیف کا دعویٰ

آسٹریلین اوپن کے تین بار فائنلسٹ رہنے والے ڈینیئل میدویدیف نے خبردار کیا ہے کہ اگرچہ وہ اس بار ’انڈر ڈاگ‘ کے طور پر میدان میں اتریں گے لیکن موجودہ فارم کی بنیاد پر انہیں شکست دینا مشکل ہوگا۔

اتوار کو برسبین انٹرنیشنل جیتنے کے بعد روسی کھلاڑی کی عالمی درجہ بندی میں 12ویں نمبر پر واپسی متوقع ہے۔ یہ گزشتہ تین ماہ میں ان کا دوسرا ٹائٹل ہے، اس سے قبل وہ اکتوبر میں قازقستان میں بھی کامیابی حاصل کر چکے ہیں۔

گزشتہ سال میدویدیف کے لیے کافی مشکل رہا، جہاں وہ چاروں گرینڈ سلامز کے ابتدائی راؤنڈز میں باہر ہو گئے اور ٹاپ 10 سے بھی نکل گئے۔

اس بحران سے نکلنے کے لیے انہوں نے اپنے پرانے کوچ سے علیحدگی اختیار کر کے تھامس جوہانسن اور روہن گوٹزکے کے ساتھ کام شروع کیا ہے۔ میدویدیف کا کہنا ہے کہ ٹیم میں تبدیلی ان کے لیے مثبت رہی ہے اور وہ اب میلبورن پارک میں سینر اور الکاراز جیسے پسندیدہ کھلاڑیوں کو ٹکر دینے کے لیے تیار ہیں۔