جرمنی : بینک میں نقب زنی ، ملزم 3 کروڑ یورو اور قیمتی اشیاء لے اڑے

جرمنی کے سیونگ بینک میں ہونے والی بڑی واردات میں ملزمان بڑے ڈرل کا استعمال کرتے ہوئے تجوری والے کمرے میں داخل ہوئے اور تقریباً 3 کروڑ یورو (3 کروڑ 50 لاکھ ڈالر) مالیت کی نقدی، سونا اور زیورات لے گئے۔

پولیس کے مطابق مغربی شہر گیلسن کیرچن میں ہونے والی اس واردات میں ملزموں نے 3,000 سے زائد لاکرز توڑ ڈالے۔پولیس نے بتایا کہ ڈاکو پارکنگ گیراج سے سرنگ کھود کر اسپارکاسے سیونگ بینک کے زیرِ زمین تہہ خانے تک پہنچے۔

تفتیش کاروں کو شبہ ہے کہ یہ گروہ پورا ہفتہ وار اختتام (ویک اینڈ) بینک کے اندر ہی موجود رہا اور لاکرز توڑتا رہا۔

اس ڈکیتی کا انکشاف پیر کی صبح اس وقت ہوا جب فائر الارم بجنے پر امدادی ٹیمیں موقع پر پہنچیں اور انہیں دیوار میں سوراخ ملا۔ گواہوں نے ہفتے اور اتوار کی درمیانی رات پارکنگ گیراج کی سیڑھیوں میں چند افراد کو بڑے بیگ لے جاتے ہوئے دیکھا تھا۔ سیکیورٹی کیمروں کی فوٹیج میں ایک کالے رنگ کی گاڑی کو بھی پیر کی صبح گیراج سے نکلتے دیکھا گیا جس میں نقاب پوش سوار تھے۔

پولیس ترجمان نے اس واردات کو ہالی وڈ فلم اوشین الیون سے تشبیہ دیتے ہوئے کہا کہ یہ انتہائی پیشہ ورانہ انداز میں انجام دی گئی ہے، جس کے لیے بہت زیادہ مہارت اور منصوبہ بندی کی گئی تھی۔ دوسری جانب متاثرہ صارفین کی بڑی تعداد بینک کے باہر جمع ہوگئی اور اپنی قیمتی اشیاء کے بارے میں معلومات کا مطالبہ کیاجب کہ ملزم تاحال مفرور ہیں۔