یو اے ای کے صدر کی آمد پر اسلام آباد میں جمعے کو عام تعطیل کا اعلان

اسلام آباد کی ضلعی انتظامیہ نے متحدہ عرب امارات کے صدر اور ابوظہبی کے حکمراں شیخ محمد بن زاید النہیان کی وفاقی دارالحکومت آمد کے موقع پر جمعے کو ’’اسلام آباد کی ریونیو حدود میں مقامی تعطیل‘‘ قرار دے دیا ہے۔

اسلام آباد کے ڈپٹی کمشنر نے سوشل میڈیا پر جاری بیان میں کہا ہے کہ اسپتالوں، پولیس، آئی سی ٹی انتظامیہ، سی ڈی اے اور یوٹیلیٹی سروسز سمیت تمام ضروری خدمات معمول کے مطابق فعال رہیں گی۔

اس اعلان کے نتیجے میں جن افراد کی ہفتہ اور اتوار کو تعطیل ہوتی ہے، ان کے لیے مسلسل چار چھٹیاں ہو جائیں گی، کیونکہ 25 دسمبر پہلے ہی سرکاری تعطیل ہے۔

اگرچہ اسلام آباد کے ڈپٹی کمشنر نے مقامی تعطیل کی وجہ بیان نہیں کی، تاہم دفترِ خارجہ نے تصدیق کی ہے کہ متحدہ عرب امارات کے صدر 26 دسمبر کو اسلام آباد پہنچیں گے۔

دفترِ خارجہ کے مطابق وزیراعظم محمد شہباز شریف کی دعوت پر ابوظہبی کے حکمراں 26 دسمبر کو پاکستان کا سرکاری دورہ کریں گے۔ یہ متحدہ عرب امارات کے صدر کی حیثیت سے ان کا پاکستان کا پہلا دورہ ہوگا۔ ان کے ہمراہ وزرا اور سینئر حکام پر مشتمل اعلیٰ سطح کا وفد بھی آئے گا۔

دفترِ خارجہ کی جانب سے جاری بیان میں کہا گیا ہے کہ دورے کے دوران ابوظہبی کے حکمراں وزیراعظم سے ملاقات کریں گے، جس میں دونوں رہنما دوطرفہ تعلقات کے تمام پہلوؤں کا جائزہ لیں گے اور باہمی دلچسپی کے علاقائی و بین الاقوامی امور پر تبادلہ خیال کریں گے۔ بیان کے مطابق یہ دورہ پاکستان اور متحدہ عرب امارات کے درمیان دیرینہ برادرانہ تعلقات کو مزید مضبوط بنانے کا ایک اہم موقع فراہم کرے گا۔