ٹرمپ کا وینزویلا کے آئل ٹینکروں کی ناکہ بندی کا حکم

امریکی صدر ڈونلڈ ٹرمپ نے منگل کے روز وینزویلا جانے اور وہاں سے نکلنے والے پابندیوں کی زد میں آنے والے تیل بردار جہازوں کی مکمل ناکہ بندی کا اعلان کرتے ہوئے کاراکاس پر دباؤ کی مہم میں نمایاں شدت پیدا کر دی ہے۔ اس اقدام کے ساتھ ہی انہوں نے وینزویلا کے خام تیل تک امریکی رسائی سے متعلق نئے مطالبات بھی سامنے رکھے ہیں۔

امریکا گزشتہ کئی ماہ سے کیریبین میں بڑے پیمانے پر فوجی تعیناتی کر رہا ہے، جس کا باضابطہ مقصد لاطینی امریکا میں منشیات کی اسمگلنگ کے خلاف کارروائیاں بتایا جا رہا ہے، تاہم اس مہم کا مرکزی ہدف وینزویلا نظر آتا ہے۔ کاراکاس اس کارروائی کو بائیں بازو کے صدر نکولس مادورو کو اقتدار سے ہٹانے اور وینزویلا کے تیل پر قبضے کی کوشش قرار دیتا ہے۔

گزشتہ چند ہفتوں سے کشیدگی میں اضافہ ہو رہا تھا، جب ٹرمپ نے وینزویلا کے خلاف ممکنہ فوجی کارروائی کے اشارے دیتے ہوئے اس کی فضائی حدود کو بند قرار دیا اور زمینی سطح پر منشیات کے خلاف کارروائیوں کا عندیہ دیا۔ گزشتہ ہفتے امریکا نے وینزویلا سے روانہ ہونے والے ایک آئل ٹینکر کو تحویل میں لے کر نئی پابندیوں کا اعلان کیا تھا۔

ٹرمپ نے اپنی سوشل میڈیا پلیٹ فارم پر لکھا کہ وہ وینزویلا میں آنے اور جانے والے تمام پابندی زدہ آئل ٹینکروں کی مکمل ناکہ بندی کا حکم دے رہے ہیں۔ انہوں نے دعویٰ کیا کہ وینزویلا جنوبی امریکا کی تاریخ کے سب سے بڑے بحری بیڑے سے گھرا ہوا ہے۔

تیل کی برآمدات پر انحصار کرنے والی وینزویلا کی معیشت کے لیے یہ اقدام شدید دباؤ کا باعث بن سکتا ہے۔ ٹرمپ نے کہا کہ امریکی بحری قوت اس وقت تک بڑھے گی جب تک وینزویلا امریکا کو وہ تیل، زمین اور دیگر اثاثے واپس نہیں کرتا جو اس نے ماضی میں قبضے میں لیے۔

وینزویلا نے امریکی اعلان کو اپنی دولت لوٹنے کی کوشش قرار دیا ہے۔ ماہرین کے مطابق تیل کی برآمدات بند ہونے کی صورت میں زرمبادلہ کی قلت، درآمدات میں کمی اور خوراک و ادویات کی قلت کا خطرہ پیدا ہو سکتا ہے۔ امریکی محکمہ دفاع نے کارروائی کو منشیات کارٹلز کے خلاف مہم قرار دیا ہے، تاہم ناقدین اسے وینزویلا کے خلاف دباؤ بڑھانے کی حکمت عملی قرار دے رہے ہیں۔