روسی صدر ولادیمیر پیوٹن دو روزہ دورے پرجمعرات کو بھارت پہنچیں گے

روسی صدر ولادی میر پوٹن جمعرات سے دو روزہ دورے پر بھارت پہنچ رہے ہیں جہاں وہ روسی تیل، میزائل سسٹمز اور فائٹر جیٹس کی مزید فروخت کی پیشکش کرینگے تاکہ جنوبی ایشیائی ملک پر امریکی دباؤ کے باعث متاثر ہونے والے توانائی اور دفاعی تعلقات کو بحال کیا جاسکے۔

روس کئی دہائیوں سے بھارت کو ہتھیار فراہم کرتا رہا ہے اور فروری 2022 میں ماسکو کی طرف سے یوکرین پر حملہ شروع کرنے کے بعد مغربی پابندیوں کے باوجود نئی دہلی بحری راستے سے روسی تیل کے سب سے بڑے خریدار کے طور پر سامنے آیا ہے۔

تاہم بھارت کی خام تیل کی درآمدات رواں ماہ 3 سال کی نچلی سطح پر پہنچنے کا امکان ہے کیونکہ روس پر پابندیاں سخت ہونے کے ساتھ بھارت کی امریکی تیل اور گیس کی خریداری میں اضافہ ہو رہا ہے۔

وزیر اعظم نریندر مودی کے ساتھ سربراہی اجلاس کے لیے4 سال میں بھارتی دارالحکومت کے اپنے پہلے دورے پر، پوٹن کے ساتھ ان کے وزیر دفاع، آندرے بیلوسوف اور کاروبار اور صنعت سے تعلق رکھنے والا ایک وسیع وفد شامل ہو گا۔

ایٹلانٹک کونسل تھنک ٹینک کے مائیکل کگلمین نے کہا کہ پوٹن کا دورہ نئی دہلی کے لیے موقع فراہم کرتا ہے کہ وہ ماسکو کے ساتھ اپنے خصوصی تعلقات کی مضبوطی کو دوبارہ اجاگر کرے اور نئے ہتھیاروں کے معاہدوں میں پیش رفت کرے۔

واشنگٹن میں قائم ادارے کے سینئر جنوبی ایشیا فیلو، کگلمین نے مزید کہا کہ بھارت-روس سربراہی اجلاس صرف دکھاوے پر مبنی نہیں ہوتے۔

انہوں نے مزید کہا کہ نئے اقدامات کا اعلان ہونے کا امکان ہے۔