پاکستان اور اردن کا آزاد فلسطینی ریاست کے حق میں دوٹوک مؤقف کا اعادہ

پاکستان اور اردن نے اتوار کے روز ایک بار پھر اس مؤقف کی توثیق کی کہ فلسطین ایک آزاد، خودمختار اور جغرافیائی طور پر مربوط ریاست ہونی چاہیے جس کی سرحدیں جنگِ جون 1967 سے پہلے والی ہوں اور جس کا دارالحکومت القدس الشریف ہو۔ دونوں ممالک نے فلسطینیوں کی جبری بے دخلی کو یکسر مسترد کیا۔ یہ اعلامیہ صدر آصف علی زرداری اور اردن کے شاہ عبداللہ دوم کے درمیان ہونے والی بات چیت کے بعد جاری ہوا، جس میں مشرقِ وسطیٰ میں امن اور استحکام کے لیے دو ریاستی حل کی ضرورت پر زور دیا گیا۔

صدر آصف زرداری نے شاہ عبداللہ دوم کو پاکستان کا اعلیٰ ترین سول ایوارڈ نشانِ پاکستان عطا کیا، جبکہ اردنی فرماں روا نے صدر آصف زرداری کو وسام النہضہ المرصع (آرڈر آف دی رینیسنس) سے نوازا۔ اعزازات کی اس تقریب سے قبل دونوں رہنماؤں نے علاقائی اور عالمی صورتحال، خصوصاً مشرقِ وسطیٰ میں امن و سلامتی کے امور کا تفصیلی جائزہ لیا۔

ملاقات کے دوران دونوں ممالک نے پاکستان اور اردن کے دیرینہ برادرانہ تعلقات کی تجدید کی اور دوطرفہ، علاقائی اور عالمی معاملات پر قریبی تعاون جاری رکھنے پر اتفاق کیا۔ دونوں رہنماؤں نے کثیرالجہتی فورمز میں تعاون بڑھانے، انسانی و ترقیاتی اقدامات کو فروغ دینے اور عوامی سطح پر روابط کے اضافے کی اہمیت اجاگر کی۔ شاہ عبداللہ دوم نے پاکستان کے ساتھ گہرے اور تاریخی تعلقات پر فخر کا اظہار کرتے ہوئے متعدد شعبوں میں تعاون کے فروغ کی خواہش کا اعادہ کیا۔

ایوانِ صدر سے جاری بیان میں کہا گیا کہ دونوں رہنماؤں نے پاکستان اور اردن کے تعلقات کے مستقبل کے بارے میں اعتماد کا اظہار کیا اور علاقائی و عالمی امور پر قریبی رابطہ برقرار رکھنے کے عزم کو دہرایا۔ شاہ عبداللہ کا یہ دورہ ایسے وقت میں ہوا ہے جب مشرقِ وسطیٰ میں کشیدگی میں دوبارہ اضافہ دیکھنے میں آ رہا ہے اور دونوں ممالک غزہ جنگِ کے بعد کی صورتحال اور ایک قابلِ عمل فلسطینی ریاست کے قیام کے اپنے اصولی مؤقف کا اعادہ کر رہے ہیں۔

ایوانِ صدر میں ہونے والی اعزازی تقریب میں وزیر اعظم شہباز شریف، چیف آف آرمی اسٹاف فیلڈ مارشل عاصم منیر، وفاقی وزرا، سفارتکاروں اور دیگر اعلیٰ حکام نے شرکت کی۔

کاپی رائٹ بزنس ریکارڈر، 2025