آئی اے ای اے کا ایران سے جوہری تعاون میں بہتری لانے کا مطالبہ

بین الاقوامی ایٹمی توانائی ایجنسی (آئی اے ای اے) کے سربراہ رافیل گروسی نے ایران پر زور دیا ہے کہ وہ اقوام متحدہ کے معائنہ کاروں کے ساتھ تعاون میں سنجیدگی سے بہتری لائے، تاکہ مغرب کے ساتھ کشیدگی میں اضافہ نہ ہو۔ برطانوی جریدے فنانشل ٹائمز کو دیے گئے انٹرویو میں رافیل گروسی نے کہا کہ ایران اور اسرائیل کے درمیان جون میں شروع ہونے والی کشیدگی کے بعد ایجنسی نے ایران میں تقریباً درجن بھر معائنے کیے ہیں، لیکن اسے اہم جوہری تنصیبات جیسے فردو، نطنز اور اصفہان تک رسائی نہیں دی گئی، جنہیں امریکا کی جانب سے بمباری کا نشانہ بنایا گیا تھا۔

رافیل گروسی نے بتایا کہ اکتوبر میں ایران کے افزودہ یورینیم کے ذخیرے کے قریب نقل و حرکت دیکھی گئی تھی، تاہم اس کا مطلب یہ نہیں کہ وہاں افزودگی کی سرگرمی جاری ہے۔ دوسری جانب ایرانی وزارتِ خارجہ کے ترجمان اسماعیل بقائی نے کہا تھا کہ رافیل گروسی بخوبی جانتے ہیں کہ ایران کا جوہری پروگرام مکمل طور پر پرامن نوعیت کا ہے اور انہیں اس حوالے سے بے بنیاد رائے نہیں دینی چاہیے۔

ایرانی حکام نے الزام عائد کیا ہے کہ آئی اے ای اے کی رپورٹ نے اسرائیل کو حملے کا جواز فراہم کیا، جو اس وقت شروع ہوئے جب ایجنسی کے بورڈ نے ایران کو جوہری عدم پھیلاؤ کے معاہدے کی خلاف ورزی کا مرتکب قرار دیا۔

رافیل گروسی نے زور دیا کہ ایران اگر معاہدے کا رکن رہنا چاہتا ہے تو اسے اپنی ذمہ داریاں پوری کرنی ہوں گی۔ ان کا کہنا تھا کہ آپ یہ نہیں کہہ سکتے کہ میں عدم پھیلاؤ معاہدے کے اندر ہوں لیکن اس کی شرائط پر عمل نہیں کروں گا۔ جنگ کی صورت میں بھی ایران کسی مختلف زمرے میں نہیں آتا۔ بصورتِ دیگر، ایجنسی کو یہ کہنا پڑے گا کہ اس نے ایران کے جوہری مواد پر اپنی نگرانی مکمل طور پر کھو دی ہے۔