پاکستان نے اینی کے 21 ایل این جی کارگو منسوخ کر دیے، قطر سے سپلائی پر دوبارہ بات چیت جاری

پاکستان نے اٹلی کی کمپنی اینی (Eni) کے ساتھ طویل مدتی معاہدے کے تحت 21 ایل این جی کارگو منسوخ کرنے کا معاہدہ کر لیا ہے، جو ملک کے گیس نیٹ ورک میں اضافی درآمدات کو کنٹرول کرنے کی حکمت عملی کا حصہ ہے۔

ریاستی ملکیت کی کمپنی پاکستان ایل این جی لمیٹڈ (پی ایل ایل ) کی 22 اکتوبر کی دستاویز کے مطابق، گیس ڈسٹری بیوٹر ایس این جی پی ایل کی درخواست پر 2026 کے لیے 11 اور 2027 کے لیے 10 کارگو منسوخ کیے جائیں گے۔ دستاویز کے مطابق، دونوں سالوں میں صرف جنوری کی شپمنٹ اور 2027 میں دسمبر کی شپمنٹ برقرار رکھی جائے گی تاکہ سردیوں میں طلب پوری کی جاسکے۔

پاکستان میں معاملے سے آگاہ دو ذرائع کے مطابق اینی نے معاہدے کی لچکدار شقوں کے تحت اس اقدام پر رضامندی ظاہر کی۔ عالمی سطح پر ایل این جی کی طلب بہت زیادہ ہے، اور سپلائرز عام طور پر اسپاٹ مارکیٹ میں فروخت کرکے طویل مدتی معاہدوں کی نسبت زیادہ کماتے ہیں۔

اینی نے تبصرے سے گریز کیا جبکہ ایس این جی پی ایل، پی ایل ایل اور پاکستان کے وزارتِ پٹرولیم نے بھی تبصرے کی درخواستوں کا جواب نہیں دیا۔

قطر سے سپلائی پر دوبارہ بات چیت

پاکستان کے ایل این جی معاہدے، قطر اور اینی کے ساتھ مجموعی طور پر سالانہ تقریباً 120 کارگو کا احاطہ کرتے ہیں، جن میں اوسطاً دو قطری معاہدوں سے ماہانہ 9 اور اینی سے ایک کارگو شامل ہے۔

پی ایل ایل کا اقدام پاکستان کی جانب سے ایل این جی خریداری کو کنٹرول کرنے کی سب سے اہم کوششوں میں سے ایک ہے، کیونکہ بڑھتی قابل تجدید توانائی کی پیداوار اور صنعتی طلب میں کمی کی وجہ سے ملک کے پاس اضافی درآمد شدہ گیس موجود ہے۔

اینی نے 2017 میں پی ایل ایل کے ساتھ ایک طویل مدتی ایل این جی سپلائی معاہدے پر دستخط کیے، جس کے تحت 2032 تک ماہانہ ایک کارگو فراہم کرنے کا وعدہ کیا گیا، ساتھ ہی شپمنٹس کو دیگر مقامات پر منتقل کرنے کا اختیار بھی شامل تھا۔

ذرائع نے بتایا کہ پاکستان قطر کے ساتھ بھی خلیجی ریاست سے گیس کی سپلائی پر بات چیت کر رہا ہے، جس میں کچھ کارگو کو موخر کرنے یا موجودہ معاہدے کی شقوں کے تحت دوبارہ فروخت کرنے کے اختیارات شامل ہیں۔

گزشتہ ہفتے ایک تکنیکی ٹیم کراچی کا دورہ کر کے کارگو کے شیڈول کو ترتیب دینے کے لیے آئی۔ ذرائع کے مطابق بات چیت جاری ہے اور ابھی تک کوئی فیصلہ نہیں ہوا۔

قطر انرجی نے فوری طور پر تبصرے سے گریز کیا۔

طلب کم، گیس زیادہ

پاکستان کے قطر اور اینی کے ساتھ طویل مدتی ایل این جی سپلائی معاہدے مجموعی طور پر سالانہ تقریباً 120 کارگو کا احاطہ کرتے ہیں جن میں اوسطاً دو قطری معاہدوں سے ماہانہ 9 اور اینی سے ایک کارگو شامل ہے۔

لیکن رواں سال پاکستان کی ایل این جی درآمدات میں نمایاں کمی آئی ہے کیونکہ پاور پروڈیوسرز کی طلب میں سولر اور ہائیڈروپاور کی پیداوار میں اضافہ کے باعث کمی واقع ہوئی ہے۔

بجلی گھروں اور اپنی بجلی پیدا کرنے والے صنعتی یونٹس کی کم گیس استعمال نے اضافی گیس میں اضافہ کر دیا ہے جس کے نتیجے میں نظام میں برسوں بعد پہلی بار کافی اضافی سپلائی موجود ہے۔

اضافی گیس کی موجودگی کے باعث پاکستان کو گیس کو بھاری رعایتوں پر فروخت کرنا، مقامی پیداوار کو محدود کرنا اور اضافی کارگو کے لیے آف شور اسٹوریج یا دوبارہ فروخت پر غور کرنا پڑا۔

کپلر کے ڈیٹا کے مطابق، اینی کا پاکستان کو آخری فراہم کردہ کارگو 3 جنوری کو گیس پورٹ ٹرمینل پر وصول ہوا۔ ذرائع کے مطابق پاکستان نے اینی کے ساتھ 2025 میں مزید کسی کارگو کی فراہمی نہ لینے پر بھی معاہدہ کیا ہے۔

اینی نے 2024 میں پاکستان کو 12 کارگو فراہم کیے تھے۔