غزہ میں صحت کا نظام بحران کا شکار ، ڈبلیو ایچ او

عالمی ادارہ صحت (ڈبلیو ایچ او) نے جمعرات کو کہا ہے کہ غزہ کے لیے امداد میں اضافہ تو ہوا ہے، تاہم یہ اب بھی ضرورت کے مقابلے میں انتہائی کم ہے، کیونکہ ادارہ علاقے کے صحت کے نظام کی بحالی کی کوشش کر رہا ہے۔

ڈبلیو ایچ او کے سربراہ ٹیڈروس اذانوم گیبرییسس نے کہا کہ ادارہ اپنے شراکت داروں کے ساتھ مل کر غزہ کے صحت کے نظام کی طویل المدتی بحالی اور تعمیر نو کے منصوبے پر کام کر رہا ہے، جس پر کم از کم 7 ارب ڈالر لاگت آنے کا تخمینہ ہے۔

ان کے مطابق دو سال سے جاری اسرائیل اور حماس کے درمیان تنازع کے دوران زخمی ہونے والے متعدد افراد اب بھی علاج کے منتظر ہیں، اگرچہ اس وقت امریکی ثالثی میں جنگ بندی نافذ ہے۔

صحت کے ادارے نے مزید کہا کہ جنگ بندی کے بعد غذائی صورتحال میں معمولی بہتری آئی ہے، لیکن حالات کو درست کرنے کے لیے ابھی بہت زیادہ کام درکار ہے۔

ڈبلیو ایچ او کے مطابق 2025 کے دوران غذائی قلت کے باعث غزہ میں 411 افراد جاں بحق ہوئے، جن میں 109 بچے شامل ہیں، جبکہ ان میں سے 84 کی عمر پانچ سال سے کم تھی۔