سنگاپور کی فینووا کے حصول پر پاکستان کی ایس ایل جی ٹریکس کی نظر

پاکستان کی سیکیور لاجسٹک-ٹریکس لمیٹڈ (ایس ایل جی ٹریکس) نے اپنی ذیلی کمپنی لاجیسرو (پرائیویٹ) لمیٹڈ کو این بی ایف سی (نان بینکنگ فنانس کمپنی) کا لائسنس ملنے کے بعد، سنگاپور میں قائم کمپنی فینووا ٹیکنالوجیز کے حصول کیلئے بات چیت کی منظوری دے دی ہے۔

لسٹڈ کمپنی نے یہ پیشرفت جمعہ کو اسٹاک ایکسچینج کو اپنے نوٹس میں ظاہر کی۔

نوٹس میں کہا گیا ہے کہ 19 اگست 2025 کو سیکیورٹیز اینڈ ایکسچینج کمیشن آف پاکستان (ایس ای سی پی) کی جانب سے ایس ایل جی ٹریکس کی مکمل ملکیت والی ذیلی کمپنی لاجیسرو (پرائیویٹ) لمیٹڈ کو این بی ایف سی لائسنس جاری کرنے کے بعد، ایس ایل جی ٹریکس کے بورڈ آف ڈائریکٹرز نے سنگاپور میں واقع سپلائی چین فنانس حل فراہم کرنے والی کمپنی فینووا ٹیکنالوجیز (پرائیویٹ) لمیٹڈ کو حاصل کرنے کے لیے مذاکرات شروع کرنے کی منظوری دے دی ہے۔

کمپنی نے بتایا کہ فینووا ایک سنگاپور میں مقیم ادارہ ہے جو ڈیجیٹل پیمنٹس اور اسمارٹ لینڈنگ حل تیار کرنے اور فراہم کرنے میں مصروف ہے۔

تاہم مجوزہ حصولِ عمل کا انحصار مکمل جانچ پڑتال، ریگولیٹری منظوریوں اور حتمی شرائط و ضوابط پر باہمی اتفاق رائے پر ہے۔

نوٹس کے مطابق اس کے نتیجے میں ایس ایل جی ٹریکس کو ایک بڑی فِن ٹیک سافٹ ویئر کی انٹلیکچوئل پراپرٹی کے پورے حقوق حاصل ہوں گے اور ممکنہ طور پر فینووا کے عملی کنٹرول کا اختیار بھی مل جائے گا۔

معلوم ہوا ہے کہ یہ فِن ٹیک پلیٹ فارم پہلے ہی چند منتخب ایس ایل جی ٹریکس ریٹیل کلائنٹس کے ساتھ پائلٹ کیا جاچکا ہے جس سے فروری 2025 سے اب تک 1.20 ملین شپمنٹس، 17 ارب روپے کے والٹ پیمنٹس، اور 3.50 ارب روپے کے قرضہ جات کی ترسیل ممکن ہوئی ہے۔

کمپنی نے بتایا کہ حصولِ عمل کے بعد ایس ایل جی ٹریکس 2025 کی چوتھی سہ ماہی میں اپنی این بی ایف سی سرگرمیاں باضابطہ طور پر شروع کرنے کا منصوبہ رکھتی ہے اور فِن ٹیک سافٹ ویئر کو اپنے 9,000 ریٹیل اور 300 کارپوریٹ ای-کامرس کلائنٹس کے لیے متعارف کرایا جائے گا۔

پلیٹ فارم میں ایک پیمنٹ پورٹل، قرضہ جات کے انتظام کا نظام اور اے آئی پر مبنی کریڈٹ انجن شامل ہے جس کا مقصد لاجسٹکس اور ڈلیوری کے عمل میں مالی معاونت کو مربوط کرنا ہے۔

نوٹس کے مطابق فِن ٹیک سافٹ ویئر سے تقویت یافتہ این بی ایف سی اقدام نہ صرف عملی کارکردگی میں بہتری لائے گا بلکہ قرضوں کے پھیلاؤ کے ذریعے ایس ایل جی ٹریکس کے ای کامرس بزنس لائن کو خاطر خواہ فروغ بھی فراہم کرے گا۔

مزید برآں فِن ٹیک سافٹ ویئر کے مکمل آئی پی حقوق کے حصول اور فینووا کے ممکنہ عملی کنٹرول سے ایس ایل جی ٹریکس کو یہ صلاحیت بھی حاصل ہوگی کہ وہ اس سافٹ ویئر کو دیگر خطوں میں مارکیٹ کرسکے۔

ایس ایل جی ٹریکس ایک پبلک لسٹڈ 4-پی ایل ادارہ ہے جس کی چار ذیلی کمپنیاں ہیں۔