سیلز ٹیکس ڈیجیٹل انٹیگریشن، ایف بی آر کی جانب سے ڈیڈ لائن میں توسیع کا امکان

فیڈرل بورڈ آف ریونیو (ایف بی آر) کی جانب سے رجسٹرڈ افراد کے سیلز ٹیکس انوائسنگ سسٹم کو ایف بی آر کے ساتھ ڈیجیٹل انٹیگریشن کی آخری تاریخ میں توسیع کیے جانے کا امکان ہے۔ کاروباری برادری کی جانب سے بارہا تین ماہ کی مہلت کی درخواست کی گئی ہے تاہم ایف بی آر 15 سے 30 دن تک کی توسیع پر غور کر رہا ہے۔

کراچی چیمبر آف کامرس اینڈ انڈسٹری (کے سی سی آئی) کے صدر محمد جاوید بلوانی نے ایف بی آر کے ممبر ان لینڈ ریونیو آپریشنز سے ڈیجیٹل انٹیگریشن کی ڈیڈ لائن میں توسیع اور تجارتی تنظیموں میں مفت انٹیگریشن سہولت کے لیے پرال کے ذریعے ڈیسک قائم کرنے کی درخواست کی ہے۔

جاوید بلوانی نے بتایا کہ ٹیکس دہندگان اس نئے سسٹم پر عملدرآمد کے لیے تیار ہیں لیکن زیادہ تعداد میں رجسٹریشن کی درخواستوں اور مختصر وقت کے باعث کئی کاروبار ابھی تک چار مجاز انٹیگریٹرز کے ذریعے رجسٹریشن مکمل نہیں کر سکے۔ انہوں نے تجویز دی کہ ایف بی آر کی جانب سے ایک آن لائن ہیلپ ڈیسک قائم کی جائے اور ایک فوکل پرسن کو نامزد کیا جائے جو زوم کے ذریعے کاروباری افراد کی رہنمائی کر سکے۔

یاد رہے کہ ایس آر او 1413(1)/2025 کے تحت پبلک کمپنیوں، ایک ارب روپے سے زائد ٹرن اوور رکھنے والی کمپنیوں اور تمام امپورٹرز کے لیے ڈیڈ لائن 10 اگست 2025 کو ختم ہو چکی ہے جبکہ یکم ستمبر 2025 سے ایف بی آر قانونی طور پر 5 لاکھ روپے جرمانے کا نوٹس جاری کر سکتا ہے۔

ذرائع کے مطابق بڑی کمپنیاں انٹیگریشن کے لیے تیار ہیں مگر چھوٹے اور موسمی درآمد کنندگان فوری طور پر اس عمل کو مکمل کرنے کی پوزیشن میں نہیں ہیں۔ اس لیے ایف بی آر کو سزا کے اقدامات میں ان حالات کو مدنظر رکھنا چاہیے تاکہ ہموار اور مؤثر عملدرآمد یقینی بنایا جا سکے۔

کاپی رائٹ بزنس ریکارڈر، 2025