پاکستانی کینڈی میکرز کا یورپ میں ذیلی کمپنی قائم کرنے کا فیصلہ

اسماعیل انڈسٹریز لمیٹڈ (آئی ایس آئی ایل) جو کنفیکشنری مصنوعات تیار کرتی ہے نے اسپین میں اپنی مکمل ملکیتی ذیلی کمپنی کے قیام کی منظوری دے دی ہے جو کمپنی کی بین الاقوامی توسیعی حکمت عملی میں ایک اہم قدم ہے اور یورپ میں اپنی موجودگی کو مضبوط بنانے کا مقصد رکھتی ہے۔

کمپنی نے جمعرات کو پاکستان اسٹاک ایکسچینج کو دی گئی اپنی نوٹس میں اس بات کی اطلاع دی کہ بورڈ آف ڈائریکٹرز نے سرکلر ریزولوشن کے ذریعے اسپین میں ذیلی کمپنی قائم کرنے کا فیصلہ کیا ہے، بشرطیکہ تمام متعلقہ ریگولیٹری منظوری حاصل کی جائے۔

اسماعیل انڈسٹریز نے بتایا کہ یہ اسٹریٹجک اقدام کمپنی کے طویل مدتی وژن میں ایک اہم سنگِ میل ہے جس کا مقصد عالمی سطح پر اپنی موجودگی بڑھانا اور بین الاقوامی مارکیٹوں میں اپنے معروف برانڈز کو مستحکم کرنا ہے۔

نئی ذیلی کمپنی اسپین میں یورپی یونین تک رسائی کا ایک اسٹریٹجک گیٹ وے فراہم کرے گی جو دنیا کی سب سے بڑی مارکیٹوں میں سے ایک ہے۔

اسماعیل انڈسٹریز لمیٹڈ کو پاکستان میں 1988 میں پرائیویٹ لمیٹڈ کمپنی کے طور پر قائم کیا گیا اور 1989 میں اسے پبلک لمیٹڈ کمپنی میں تبدیل کردیا گیا۔

کمپنی شوگر، کنفیکشنری مصنوعات، بسکٹس، آلو کے چپس، کاسٹ پولی پروپیلین (سی سی پی) اور بائی ایکسلی اورینٹڈ پولی ایتھیلین ٹیرفیتھلیٹ فلم کی تیاری اور فروخت میں سرگرم ہے، جو بالترتیب برانڈز کینڈی لینڈ، بسکونی، اسنیک سٹی اور ایسٹرو فلمز کے تحت مارکیٹ میں پیش کی جاتی ہیں۔

گزشتہ سال اسماعیل انڈسٹریز نے ابو ظبی میں اپنی مکمل ملکیتی ذیلی کمپنی قائم کرنے کا اعلان بھی کیا تھا۔